San Pra Ai Laura Vicuna ( Hkawnsek ) A Poi Nhtoi ( January 22 ) 22 January 2023

San Pra Ai Laura Vicuna ( Hkawnsek ) A Poi Nhtoi ( January 22 )

San Pra Ai Laura Vicuna gaw, sanseng sanpra ai lam hte wenyi n gun atsam hte seng nna, kasi la ging ai sanpra ai masha rai nga ai. Shi a sak (10) ning du ai ten kaw nna, agung alau law law hkrum timung, shi a hkum hpe sanseng san pra hkra lu makawp maga da nga ai. Ndai zawn shi a yaw shada tawn ai lam the kanu a wenyi hpe hkye la lu hkra shakut ai lam hta awng dang lu na matu, shi a hkum hpe Karai Kasang kaw ap nawng da nu ai.

Laura Vicuna gaw, 1891 ning hta Chile mungdan Santiago mare kaw shangai wa ai lam chye lu ai. Shi a kawa gaw hpyen la rai nhtawm me, Laura asak (2) ning sha naw rai yang, nnga mat sai rai nga ai. Dai majaw, shi a kanu Mercedes gaw, hpyen dap kaw nna, mare kaga de htawt nga ra mat nu ai. Dai mare kaw shi a kanu gaw kanbau amu a majaw, amu galaw sha na shara dam lada lu ai dinghku la langai mi a num kaji sa tai nga ra mat sai lam labau hta mu lu ai.Dai n shawp ai sahti wa a mying gaw Manuel Mora ngu ai wa rai nga ai.

Shingrai, Laura asak (8) ning du ai shaloi Salesian Mama jawng kaw laika hpaji sharin let sa nga mat nu ai. Mama ni a kasi kaja hpe mu lu ai shaloi, sumsing mungdan a lam hta, shi grau sharawng myit rawng wa sai. Shi hkum nan mung Mama tai mayu ai myit ja ja rawng wa nu ai. Laura asak (10) ning du ai shaloi, Kanu hpe wa jahkrum lu nu ai. Dai zawn Laura nta kaw du nga ai ten lani mi hta, sun madu Manuel Mora dingla gaw, Laura hpe nse nsa myit rawng wa nna, gunglau na dawdan nu ai. Shanu a nta kaw nna, shi a sun wang kata de sa htawt nga na matu sa shadut nu ai.Laura gaw, dai dingla wa a n shawp ai myit hpe mu chye ai majaw, dai shara kaw nna hprawng mat mayu ai myit rawng nga nu ai. Raitimung, Laura gaw machyi makaw hkrum nga nna, nlu hprawng yen mat ai. Dai shaloi mazut dik ai Manuel Mona gaw dai hpe ahkaw ahkang la nna nse nsa galaw na matu gyam yu ai raitim n awng dang ai majaw, shi a shangun ma ni hpe Laura hpe n dum hkra jawm adup shangun sai rai nga ai.

Shingrai sanpra ai Laura gaw, adup zingri sat nna si wa maw ai shaloi, kanu hpe; “Tsawra dik ai Nu e, nu a wenyi hkye la hkrum na matu, nye a hkum Karai Kasang kaw ap kau ya ni ai yaw” ngu nna tsun kau da sai rai nga ai. Kasha a ga dai hpe na ai shaloi kanu Mercedes gaw hkrap myi prwi the Nu a tsawra dik ai Ma e, nu a mara ni hpe hkyamsa jaw ya rit yaw, dai ni kaw nna, nu a prat hpe galai shai let nga mat na, ga sadi, Ma hpe nu jaw dat nngai le yaw” ngu ga sadi jaw dat nu ai. Ndai zawn Laura yam nu a lapran na yawn hkyen mabyin ndai byin ngut ai hpang bat mi na ai shaloi, a asak (13) ning sha naw re ai Laura gaw nsa hti mat sai rai nga ai.

Shi nnga mat ai hpang nawku hpung kawn nna Laura hpe san pra ai masha shatai let shi a poi nhtoi hpe January shata (22) ya shani ngu masat shagrin dat ya sai rai nga ai.

Shingrai, daini san pra ai Laura a poi nhtoi hpe galaw nga ai ten, anhte nang ngai yawng mung, san pra ai Laura ai kasi hpe la nna, tinang a san seng san pra ai prat hpe manu shadan lu hkra shakut sa wa ga ngu, n gun jaw dat lu n ngai law.

By; Sister Rose Angeline Maran Nang Doi (SFX)

RVA-Kachin Service (Myitkina)