San Pra ai Landericus @ Landry a Poi Nhtoi (June 10)

San Pra ai Landericus gaw, A.D (650-661) ning laman Fransik mungdan a mare daju Paris kaw na Saradaw lit magam gun hpai lai wa sai rai nga ai.
Shi gaw, Matsan mayan hte shagrit hkrum ai ni hpe shawang tsawra myit kaba hte aten tup galaw daw jau ya ai. Mungdan kata hku kaba hkrum wa ai aten hta mung, shi lu ai sutgan hte Nawku Hpung na n lang sai Nawku arung arai ni hpe dut nhtawm matsan masha ni hpe lusha mari jaw wu ai.
Paris mare kaw, San Pra ai Hkristofa hpe shagrau masat nna shawng ning nan tsi rung langai mi mung gaw gap da ya sai. Hpang daw de, dai tsirung gaw mying grai dan hkung la ai Hotel Diedu byin wa sai.
Hpung masha ni a wenyi lam a matu, Hkawhkam Clovis jaw shagrau ya ai shara kaw Saradaw (23) hte myit jahkrum ta masat lamang galaw nna San Pra ai Denis a mying shamying ai Tawra Jau jawng gaw gap da ya sai. Dai jawng kaw, Benedictine Jau ni hpe yu gawn na lit shatsam ya sai. San Pra ai Saradaw Landericus gaw, shi n nga mat na shawng e, Tawra Jau Marculfus hpe (Ecclesisstical Formula) “Nawku Hpung hte Seng ai Hkrang ni” ngu mying ai laika buk hpe ka shagrin lu na matu lit shatsam kau da ya sai.
Dai hpang, San Pra ai Saradaw Landericus gaw, A.D (661) hta, Madu kaw yup pyaw ban sa mat wa sai rai nga ai.
San Pra ai Saradaw Landericus n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, June shata (10) ya shani ngu masat shagrau dat ya sai rai nga ai.

By;
Sister Rose Angeline Maran Nang Doi (SFX)
RVA-Kachin Service (Myitkyina)