San Pra Ai A Labau ( 18 August 2021 )

San Pra ai Helena a Poi Nhtoi (August 18)

San Pra ai Helena gaw, Coel mying ai English hkawmhkam a kasha re nga nna, labau hkai hkrat wa ma ai. Shi gaw, Roma hpyen du kaba Constansius hte dinghku de nna, Constantine mying ai kasha langai lu ai. A.D (293) ning hta Constansius hkawhkam gaw madu jan Helena hte jahka kau hkrum sai. Raosa Asuya e shi hpe Caesar ngu ai amying shing teng jaw ya da ai re majaw, Roma hkawhkam kaba, Emperor Maximian a kanam Theodora hpe la ra mat nna Helena hpe jahka kau ra mat ai.

Helena gaw, kasha Constantine hkawhkam tai wa ai hpang, hpung masha tai wa sai. Kasha Constantine gaw kanu Helena hpe Hkawhkam kaba Jan, Empress ngu shagrau ya nna dazik law law mung jaw shagrau ya lai wa ai. Hkik hkam dik ai amying shingteng shagrau hkrum timung Helena gaw, galoi mung yu maya buhpun hpe sari hte hkrak rai bu hpun nna shi a aten malawng hpe matsan masha ni hpe galaw daw ai magam bungli ni hta shama kau kau rai nga ai.

Asak (83) ning hta, Kalwari Kawng ntsa na Nawku jawng gaw gap ai lam hpe woi awn ya lai wa sai. Madu Yesua a Wudang hpe tam na matu, Yerusalem mare de akyu hpyi hkrun lam sa lai wa ai. Ga kata kaw na Wudang masum lu htu shaw la ai. San Pra ai Helena gaw, Tsanlun Kawng ntsa e grai hkik hkam ai Nawku jawng langai mi gaw gap da ya sai. Sinpraw dan de sa du nhtawm, San Pra ai Lucian masat dingsat Drepanum mare hpe sa shatsawm kau da ai. Htawm hpang de Drepanum mare hpe kasha Hkawhkam Constansine gaw, Kanu hpe shagrau hkungga jaw ai msat dingsat shatai nna, Helenopolis ngu nna shamying ya ai.

Tara grai shakut nga lai wa ai hpang, San Pra ai Helena gaw, shi galaw da ai shawang tsawra myit hte seng ai magam bungli ni kaw na grau lusu wa ai. San Pra ai Empress Helena gaw, kasha Constantine hkawhkam tai ai hpang (20) ning hta, Roma mare kaw n nga mat wa sai rai nga ai.

San Pra ai Helena N nga mat ai hpang, Nawku hpung gaw, Shi hpe, San Pra ai masha dang dat ya let, Shi a Poi Nhtoi hpe mung, August shata (18) ya shani masat shagrau dat ya sai rai nga ai.

Daini, Nawku Hpung gaw, San Pra ai Helena a Poi hpe galaw nga ga ai zawn, anhte hpung masha ni mung, San Pra ai Helena hpe kasi yu la let, ndai ding hta sak prat hkrun lam hta, shawang tsawra myit hte mai kaja ai magam lam ni law law lu galaw lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)