San Pra Ai A Labau ( 13 August 2021 )

San Pra ai Brother Benildus a Poi Nhtoi (August 13)

San Pra ai Brother Benildus gaw, Fransik mungdan, Thuret mare kaw 1805 ning, June shata (14) ya shani hta shangai chyinghkai wa ai rai nga ai. Shi a Kashin Kamun mying gaw, Peter Ramaneon rai nga ai. Shi gaw, laika hpaji hpe san pra ai John Baptist De La Sale de da ai Brothers of the Christian Schools ni kaw na sharin hkam la ai.

Dai Brother ni a wuhpung de shang ai hpang, Benildus ngu ai mying hpe bai la ai. Brother tai wa ai hpang shanhte a laika sharin jawng law law kaw laika sharin ya ai. Saugues mare na jawng hta shi gaw Brother Kaba lit magam hpe mung gun hpai lai wa ai.

Brother Benildus gaw jawngma ni, shi a manang Brother ni hte mare masha ni a ntsa garan gam jaw myit grai kaba ai. Ramma ni hpe hpu nau tsawra matsan dum myit kaba tawn ai, sharin atsam rawng ai, kasi tai ai lam ni a majaw, Saugues jawng kaw jawngma grai law jat wa ai. Jawngma ni a ntsa shi tawn da ai hpu nau tsawra myit gaw shi si ai aten du hkra rai nga ai.

Ndai zawn Karai Magam hpe gun hpa nga ai aten, 1862 ning, August shata (13) ya shani, San Pra ai Brother Benildus, Madu a lahpyen hta ban sa yup pyaw mat wa sai rai nga ai.

Shi n nga mat ai hpang, 1948 ning, April shata praw (4) ya shani hta, dai aten na, Wa Sarabyin Pius (XII) kawn, Shi hpe A Lu ai masha hku nna masat shagrau dat sai rai nga ai.

Dai hpang, 1967 ning, October shata (29) ya shani hta gaw, dai aten na, Wa Sarabyin Pawlu (VI) kawn Shi hpe San Pra ai masha hku nna dang dat let, Shi a Poi Nhtoi hpe mung, August shata (13) ya shani masat dat ya sai rai nga ai.

Dai majaw, Nawku hpung gaw daini na aten du hkra shaning shagu August shata (13) ya shani hta San Pra ai Brother Benildus a Poi hpe galaw ya nga ding yang rai nga ai re. Anhte hpung masha ni mung, Brother a Prat labau kadun hpe hti hkaja la lu sai hte maren, anhte a sak prang hkrun lam hta yawng hpe kahpu kanau myit majing hte tsawra hku hkau kanawn mazum lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)