San Pra ai Kasa Yawhan a Poi Nhtoi (December 27) 27 December 2022

San Pra ai Kasa Yawhan a Poi Nhtoi (December 27)

San Pra ai Kasa Yawhan gaw, Madu Yesu grai tsawra ai Kasa rai nga ai. Shi gaw, Zebedi a kasha, Yaku kaba a kanau mung rai nga ai. Lani mi hta shan nau gaw, Galile hka nawng makau kaw sumgawn hte nga hkan nga yang, Madu Yesu lai wa let shaga la hkrum ai. “Dai shaloi jang shan nau gaw, shan a kawa hte li ni hpe rap di tawn kau da nhtawm, Madu Yesu a hpang hkan nang mat wa manu ai. (Mahte 4:22)

Yesu gaw, shan nau a nden ja ai myit hpe yu nna shan nau hpe “Boanergers” (Shing n rai) Sons of Thunder; ngu nna myit hkawt shamying ya wu ai. (Makru 3: 17)

Kasa Yawhan gaw, kasa ni yawng hta kaji htum rai nga ai; shi hkum hpe shi gaw, “Yesu a Tsawra ai Kasa” nga nna shamyit la ai hpe mu hti lu nga ai. (Yawhan 13: 23)

Madu Yesu, Hpraw Nsam Galai ai mabyin kaw mung shi lawm nga ai. Hpang jahtum shana shat sha ai shaloi mung, Madu Yesu a lahpyen de htep sa wa nhtawm; “Madu hpe ap kau na kadai rai a ta?” nga nna san wau ai. Madu Yesu, Wudang ntsa kaw jen noi sat kau hkrum ai shaloi, Wudang pawt kasa ni law law nga ai hta na Shi hkrai shat sap ngam nga ai. Shaloi, Madu Yesu gaw, Shi a Kanu Maria hpe yu gawn na matu Yawhan hpe lit shatsam da wu ai; dai gaw tsaw htum ai ahkaw ahkang rai nga ai; dai ahkaw ahkang hpe Yawhan lu la sai.

Nawku Hpung hkai hkrat wa ai labau hta Kasa Yawhan gaw, A.D (49) ning hta Ephesu Mare kaw nga nhtawm, Chyoi Pra ai Nu Maria Sumsing Lamu Ja Mungdan de Shalun la hkrum ai mabyin hpe sak se tai ya sai. Ephesu mare kaw nna gawt kau hkrum ai hpang Patmos Zinlawng de du mat wa ai. Dai Zinlawng kaw “Shingran Laika” hpe ka da ya sai rai nga ai.

Dai hpang Ephesu mare de bai du wa ai shaloi, Karai Kasang a lachyum hpe “Karai Gaw Tsawra Myit” God is Love ngu ai Ga Hkaw Masum hte shaleng da ya sai. (1Yawhan 4:7). Dai shara kaw na “Mali ngu na Kabu Gara Shiga” 4^th Gospel hpe ka da ya sai. Karai Kasang hte seng nna shi a machye machyang hpaji, shaman chyeju hpe shadan shaleng ya ai hku nna, Shi hpe “Langji Sumla Masat” hte madun ya nga ai.

Kasa Yawhan gaw, asak grai kaba mat wa ai shaloi, shi a Hpung Masha ni hpe; “Ngai shu ngai sha ni e, nanhte shada da tsawra let nga nga mu.” Nga nna ding yang shadum ai. Ga dai hpe hkrai sha hpa majaw ding yang tsun ai kun, nga nna Hpung Masha ni kawn shi hpe san ai shaloi; “Ga ndai gaw Madu Yesu tsun da ai ga rai nga ai; dai hpe hkan shatup jang grai jaw sai; kaga hpa mung n ra sai.” nga nna htan ya ya rai wu ai.

San Pra ai Kasa Yawhan gaw, shi a asak (101) ning hta, Ephesu mare kaw, Madu hta e yup pyaw ban sa wa sai rai nga ai.

Nawku Hpung gaw, shaning shagu December shata (27) ya shani hta e San Pra ai Kasa Yawhan a Poi Nhtoi hpe ding yang galaw ya nga ai re.

Daini Kasa Yawhan a Poi Nhtoi hpe galaw nga ai aten hta, anhte Hpung Masha ni mung, tinang Madu Yesu kaw na lu la da sai, Makam Masham hpe e, hpunau ni hpe gam garan ya lu ai ni byin tai lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)