San Pra ai Kasa Andrew a Poi Nhtoi (November 30)

St. Andrew the Apostle (November 30)

San Pra ai Andrew gaw, Madu Yesu a Kasa shi lahkawng kaw na malawm langai mi rai nga ai. Shi gaw, Galilee mung, Bethsaida kahtanwg kaw lai wa sai A.D 5-10 ning ram hkan shangai wa ai re lam, shi a labau laikabuk ni hta mu lu nga ai. Bai shi gaw, yu maya nga hkwi sha ai masha wa mung rai nga ai. Shi a kawa gaw, Jona rai nhtawm, shi a kahpu gaw, Kasa Petru (Shing N rai) Simon Peter rai nga ai. Nazaret mare na, Yesu a hpang de garai n hkang shi yang, shi gaw Yawhan Baptista a hpang hkan nang ai wa rai nga ai.

San Pra ai Andrew gaw, “Nga hkwi sha ai ni laksan kamhpa mai ai san pra ai masha” rai nga ai. Shi gaw, (Chyoi Pra ai Wenyi yu hkrat wa ai poi (Pentecost) hpang kaw nna, Russia, Greece hte Scotland mungdan ni hkan Madu a Kabu Gara Shiga hkawn hkawm ai majaw, dai mungdan masum hpe yu gawn ai San Pra ai masha ngu nna mung hkap la nga ai re.

Yawhan Baptista a lata kaw na, Madu Yesu Kashin Kamun hkap la ai hpang, San Pra ai Andrew gaw, Madu Yesu hpe; “Nang kanang kaw nga n ta? ngu nna sai ai shaloi, Madu Yesu gaw shi hpe; “She sa wa yu rit; shaloi mu lu na ndai” ngu nna bai htan ya wu ai. Dai hpang shani Andrew gaw, shi a Kahpu Petru (Shing n rai) Simon Peter hpang de sa nhtawm, “Anhte gaw, Hkye la Madu Messiah hpe mu lu saga ai.” nga nna tsun da ai hpang, Kahpu Petru hpe Madu Yesu hpang de woi sa wu ai. (Yawhan 1:35-42)

Shaloi Yesu gaw, Ngai kaw hkan marit; masha hpe hkan hkwi na masha, ngai nan hpe shatai na made ai, ngu nna shan hpe tsun mu ai. (Mahte 4:19)

Dai aten kaw nna shan nau lahkawng gaw, Madu Yesu a kasa ni tai mat wa nna, mungkan chyam hkra Madu a Kabu Gara Shiga hpe hkaw hkawm mat wa manu ai.

San Pra ai Andrew hpe lai wa sai A.D 60 ning ram aten hta Greece mungdan kaw na Petras ngu ai shara kaw, “X” masat hku Wudang galaw nhtawm jen sat kau ma ai. Shi garai n si yang dai “X” masat hte re ai Wudang ntsa kaw nna lahkawng ya tup, sa du ai hpung masha ni hpe makam masham hte seng ai matsun maroi ga tsun kau da ai, nga nna labau hkai hkrat wa ai rai nga ai.

Constantine hkawhkam gaw, San Pra ai Kasa Andrew a moimang hpe Kasa ni a Nawku Htingnu “Church of the Apostles” de la wa nhtawm makoi mayang da wu ai. Raitimung, shi a hpang hkang galai ai Latin amyu sha uphkang du ni gaw, San Pra ai Kasa Andrew a nrut nra ni hpe 1270 ning hta, Italy Mungdan, Amlfi mare na Saradaw a Nawku Htingnu kaw bai htawt makoi da wu ai.

Shi a Poi Nhtoi hpe Nawku hpung gaw, shaning shagu November shata (30) ya shani hta galaw ya nga ai rai nga ai.

San Pra ai Kasa Andrew a labau kadun hpe hti hkaja la nna, anhte hpung masha ni mung, kaning re ai prat hte sak hkrung hkawmsa nga ga ai raitim, Madu a shaga la ai nsen hpe galoi mung, madat let, shi Madu myit ra sharawng ai hku nna sak hkrung hkawmsa lu hkra shakut nga ga law.

By;
Sister Rose Angeline Maran Nang Doi (SFX)
RVA-Kachin Service (Myitkyina)

Add new comment

7 + 4 =