San Pra ai Justus hte Pastor Yen nau a Poi Nhtoi (August 6)

San Pra ai Justus hte Pastor yen nau gaw, tsa ban masum htum wa mahka de Spain mungdan kaw shangai chyinghkai wa ma ai. Shan nau a kanu kawa ni gaw, makam masham myit grai jung ai ni rai ma ai. Dai aten hta, Hkristian ni malawng gaw, tinang a makam masham hpe lagyim nna hkan shatup let nga ra ai aten rai nga ai.

Dai aten ni hta, Nawku hpung hpe Diocletian hkawhkam laja lana zingri shamyit nga ai aten mung rai nga ai. Spain mungdan a uphkang aya lu ai Dacian mung, Hkristian ni hpe n sten ai myit hte jep shatsang nga ai aren re. Justus hte Pastor yen nau gaw, shan nau a makam masham hpe n hkring n tsang ai sha hkap la ai majaw, masha myit n myit ai ni a lata hta zingri zingrat hpan magup hpe hkam la ra ma ai. Dai zawn, shan nau gaw, Kaning re ai zingri zingrat lam ni hkrum wa timung, Madu Yesu hpe kam hpa shamyet shana let, makam masham ni hpe hkan sa shatup na matu hkrit myit tsep kawp n rawng ai sha sak hkrung lai wa ma ai. Dai majaw, Dacian gaw, ndai San Pra ai Ma yen nau hpe A.D 304 ning hta Spain mungdan, Alcala mare kaw baw kahtam di sat kau hkrum lai wa ma ai.

Makam masham a majaw, sat kau hkrum ai aten hta, San Pra ai Justus gaw asak (13), San Pra ai Pastor gaw (9) ning, jawngma sha naw rai nga ma ai. Ndai San Pra ai ma yen nau gaw, Spain mungdan, Madrid mare hte Alcala ni hpe makawp maga ai “Patrons of Madrid and Alcala” San Pra ai yen nau rai nga ai.

Ya na zawn, asak kaji tim, makam masham hpe gwi gwi hkap la let yawng a matu kasi madun lai mat wa sai, San Pra ai Justus hte Pastor Yen nau a Poi hpe, Nawku hpung kaw nna, shaning shagu August shata (6) ya shani hta galaw ya nga ga ai re. Anhte hpung masha ni mung, San Pra ai Justus hte Pastor Yen nau zawn tinang hkap la da sai makam masham hpe kaning re ai ahkying aten hta raitim, hkan sa shatup lu hkra shakut sa wa nga ga law.  

By;

Sister Rose Angeline Maran Nang Doi (SFX)

RVA-Kachin Service (Myitkyina)