San Pra ai Justus hte Pastor Yan Nau a Poi Nhtoi (August 6) 06 August 2022

San Pra ai Justus hte Pastor Yan Nau a Poi Nhtoi (August 6)

San Pra ai Justus hte Pastor yan nau gaw, tsa ban (3) htum wa mahka de Spain Mungdan kaw shangai chyinghkai wa ma ai. Shan nau a kanu kawa ni gaw, makam masham grai ngang ai ni rai ma ai. Dai aten hta, Hkristian ni malawng maga gaw, tinang a makam masham hpe lagyim nna hkan shatup let nga ra ai aten rai nga ai.

Dai aten ni hta, Nawku hpung hpe Diocletian Hkawhkam kawn laja lana zingri shamyit nga ai aten mung rai nga ai. Spain mungdan a uphkang aya lu ai Dacian mung, Hkristian ni hpe n tsen ai myit hte jep shatsang nga ai aten re. Justus hte Pastor yan nau gaw, shan nau a makam masham hpe n hkrit n tsang ai sha hkap la ai majaw, masha myit n rawng ai ni a lata hta zingri zingrat hpan magup hpe hkam la ra ma ai.

Dai zawn, shan nau gaw, Kaning re ai zingri zingrat lam ni hkrum wa timung, Madu Yesu hpe kam hpa shamyet shanat let, makam masham ni hpe hkan sa shatup na matu hkrit myit tsep kawp n rawng ai sha sak hkrung lai wa ma ai. Dai majaw, Dacian a lata hta, ndai San Pra ai Ma yan nau gaw, A.D 304 ning e, Spain Mungdan, Alcala Mare kaw baw kahtam di sat kau ai hpe hkrum lai wa masai.

Makam masham a majaw, sat kau hkrum ai aten hta, San Pra ai Justus gaw asak (13) ning, San Pra ai Pastor gaw (9) ning, jawngma sha naw rai nga ma ai. Ndai San Pra ai ma yan nau gaw, Spain Mungdan, Madrid mare hte Alcala ni hpe makawp maga ai San Pra ai yan nau “Patrons of Madrid and Alcala” rai nga ai.

Dai zawn rai nna, asak kaji tim, makam masham hpe gwi gwi hkap la let, sat kau hkrum lai wa ai hpang, Nawku Hpung kawn, shan nau hpe, San Pra ai Masha dang dat let, Shannau a Poi Nhtoi hpe Mung, August shata (6) ya shani masat shagrau dat ya sai rai nga ai.

Daini Nawku Hpung gaw, San Pra ai Justus hte Pastor Yan nau a Poi Nhtoi hpe galaw nga ga ai aten hta, San Pra ai Yan Nau zawn, anhte Hpung Masha ni mung, tinang hkap la da sai Makam Masham hpe kaga masha ni jahpoi asawng rai wa ai aten hte Makam Masham a matu sakse hkam ra wa ai aten ni hta gwi gwi rai sak se hkam lu ai ni byin tai lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)