San Pra ai Justina hte San Pra ai Cyprian a lam Daw 2 (18 June 2019)

San Pra Ai Justina hte Siprian a lam  daw 2

          Nawku hpung a labau lam hpe hkap madat la na ten bai du wa magang nga sai the rau, daini na lamang hta, San Pra ai Justina a labau lam hte seng nna, ngam nga ai daw hpe, mu hti hka ja lu ai made mi gam garan ya na matu lajang da n ngai.

          Nu wa hpu nau ni, lai sai lamang hta, nhkru nkaja ai, Siprian gaw, SanPra ai Justina a majaw, myit yawn myit malai let, shi a n hkru nkaja ai lam yawng hpe tawn kau nna, teng man ai makam masham de shang wa sai lam na la lu saga ai rai nga ai. Shingrai, kade n na yang,Nawku hpung a tara lam ni hpe sharin achyin la ngut sai majaw,Siprian gaw kashin kamun hkam la lu sai. Lam shagu hta shi a arawn alai ni gaw, yawng a matu kaja ai kasi kamang ni tai wa sai majaw,Saradaw shi hpe Jau tai ai Sakramentu mung hkam ya ai. Dai saradaw si mat ai hpang de,Siprian gaw shi a hkang galai nna, Nawku hpung a tara lam ni hpe myit manoi nga ai. Siprian a lakhtak e shaning shagu Nawku hpung gaw grai maden jat wa sai. Ndai zawn law la ai tara mai gan masha ni Madu yesu hpe kam sham mat wa sai majaw, mung up agyi wa grai myit kaji wa nu ai. Shaloi makam masham hpung hpe zingri na matu amyik jaw dat nu ai. Dai ahkaw ahkang a majaw, shi a hpenla ni gaw Siprian hpe rim la nhtawm me, htawng hta jahkrat bang tawn masai. Dai aten hta San Pra ai Justina gaw Damasku ngu ai  loi tsan ai shara hta shabrai  nsha ai sha, tarahkaw saranum  a mu gun hpai nga ai ten rai nga ai. Dai a lu ai mahkawn numsha hpe mung rim la na matu, nhkru ai agyi wa htet da nu ai. Dai hpang, lani mi hta dai san pra ai yan hpe shi a rung de  woi sa shangun n htawm, shi gaw, nan gaw Hkristian htung hpe kau da nna, anhte a hpara sumla ni hpe nawku ra na re, dai nrai yang si lu na myit dai  ngu dat nu ai.

Raitimung Siprian hte Justina gaw Karai kasang hpe grai tsawra nga ma ai majaw, dai Madu hpe kachyi mi pyi n ngyet kau hkraw ma ai, shingrai, munggyi wa, ja ja masin pawt ai hte rawt tsap let, ndai yan hpe lawan sat kau mu, ngu nna shi a  ali ama ni hpe jahtau tsun dat nu ai. Dai re ai majaw, hpyen la ni gaw Siprian hpe saboi galu ntsa e sharen da nhtawm me, grai kaba ai hpri chyinghkyi hte gang je ashep kau manu ai. San Pra ai Justina hpe mung shadaw kaw gyit da nhtawm, nga hpyi hte galaw ai  sumri hte ahpye alam rai hkra, anu kayet zingri sai rai nga ai. Ya na zawn shan lahkaw gaw, mala la ladu lai hkra zingri zingrat ai hkrum timumg, Madu yesu amying ningsang hpe shakawn kungdawn, mahkawn mangwi nga ma ai. Shaloi agyi wa gaw  shan a makam masham shawoi na hta grau ja wa ai hpe bai mu jang, prut kaprawk nga ai hpunlum di kaba hta, shan lahkawng hpe lang lata bang da shangun nu ai. shan gaw tinang a hkum ntsa e Wudang masat galaw nna, kabu gara let hpunlum di kata de shang wa masai.  Raitimung hpyi kaji mi pyi n malu ai sha, shan bai lawt pyu wa ai hpe mung jang yawng gaw mau taw nga masai da e. Ndai zawn byin wa ai lamik kumla hpe mu jang, agyi wa a mayam ali ama langai mi gaw, ndai yan gaw mandan lakle a majaw she, ning rai nna nga lu ai rai nga ma ai. Anhte a hpara mung ndai hte maren makawp maga ya lu ai ngu nna, shi a nteng nman ai hpara a mying hpe gang nhtawm, dai hpunlum di hta gum htawn bang dat nu ai.

Dai nhkru nkaja a hpyenma gaw, Karai Kasang hpe shanhte a nat hpara hte shabung ai majaw, prut kaprawk nga ai hpunlum di kaba hta, gum htawn bang dat ai the, hkring mi laman hta, hkut si mat wa sai. Munggyi wa, dai zawn byin ai mauhpa lam ni hpe mu lu timung, gumrawng gumtawng ai myit a majaw, myit n malai hkraw ai sha, Siprian yan Justina a baw hpe htau kau shangun sai rai nga ai. Shingrai shi hkang dat ai hte maren, ndai chyoi pra ai yan gaw Yesu a matu, kabu gara ai hte si hkam sai lam labau hta mu lu nga mali ai nu wa ni. N hkru n kaja ai hte mazut myit rawng nga ai munggyi  salang wa a man e, ding hpring ai masha kadai rai timung nmai hkrit ai lam kasi ningli yawng hpe madun dan sai rai nga ai. Dai majaw hpung masha ni gaw, ndai Siprian the Justina yan hpe grai chyeju dum, grai hkungga shakawn nga ma ai lam daini du hkra nawku hpung a labau hta hkra mu mada lu nga mali ai re. San Pra ai Justina a san seng san pra ai hte Madu Karai Kasang hpe kam sham nawku daw jau ai lam hte, ap nawng shakut shaja ai, teng man ai lam hta gwi ai myit masin hte shakut shaja ai a majaw, n hkru nkaja myit rawng ai Siprian mung myit malai kaba hte tengman ai makam masham hpe lu la sai rai nga ai. Myit masin san seng let, shagrit shanem ai myit, ap nawng daw jau ai, teng man ai lam hta sak se hkam shakut shaja ai lam gaw, manang wa hpe galai shai shangun lu ai lam anhte yawng asan sha na la lu saga ai rai nga ai. Manang wa gade mung n hkru n kaja u ga, tinang gaw, galoi mung kaja nga na ahkayk nga mali ai.

          Tinang kaja taw jang, ganing re ai nhkru nkaja ai mung sum prat shang lu na nrai nga ai. Nu wa ni, San pra ai masha ni yawng gaw, nang, ngai anhte zawn shinggyim masha ni hkrai rai nga ai. Shanhte sak hkrung nga ai ten, teng man ai makam masham hta tsap let, jaw kaja ai, ap nawng shakut ai, tinang a hkum hpe nyet kau let, Madu Karai Kasang a matu shakut shaja ai re majaw, hpang jahtum san pra ai masha ni hku nna shakawn shagrau hkrum ai ni hkrai rai nga ai. Lahta de anhte na la lu sai San Pra ai Siprian mung, nnan daw hta, lu su sahti, nhkru nkaja, nat hpara nawku ai grai mazut ai wa rai nga ai. San Pra ai Justina hpe grai tsawra nhtawm me, ja sut gan arawng aya ni hte san pra ai Justina a prat hpe lu hkra la na matu, shakut ai wa rai nga ai. Raitim, San Pra ai Justina a Karai Kasang hta sadi dung ai makam masham ni a majaw, hpang jahtum ja sut gan arawng aya hte hpring tsup ai Siprian pi myit malai kaba lu mat nna, Hkristian makam masham de shang wa ai sha n ga, San Pra ai masha du hkra byin tai mat wa sai lam gaw, mau hpa chyeju atsam kaba nan rai nga ai. Shinigrai, Karai Kasang a chyeju atsam gaw, lam shagu hta awng dang lu ai mau hpa atsam nan rai nga ai. Anhte nang ngai yawng mung, ganing re ai nhkru nkaja ai, agung alau lam hta hkrum hkra wa ai ten, Madu Karai Wa kaw sit shang let, San Pra ai Justina hte, San Pra ai Siprian yen kaw akyu hpyi la ga. Chyoi Pra ai Kahtawlik Nawku hpung kawn nna, shaning shagu September 26 ya shani hta San  Siprian yan San Justina hpe Mungkan ting na nawku hpung msha ni yawng, hkungga lara shakawn shagrau, akyu ara hpyi la na matu masat da ya sai rai nga ai. Shingrai, nu wa hpu nau ni, ndai nhtoi du shagu, San Pra ai Siprian hte San Pra ai Justina yen kaw, lak lai ai chyeju ni hpyi la nga ga ngu, n gun jaw let, Teng man ai makam masham hta tsap lu hkra, shakut nga ga law.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.