San Pra ai Junípero Serra a Poi Nhtoi (July 1)

San Pra ai Miguel José Serra Ferrer gaw, Spain Mungdan na Majorca zinlawng kaw 1713 ning, November shata (24) ya shani shangai chyinghkai wa ai rai nga ai. Franciscan Tawra Jau Magam Wuhpung shang ai hpang, shi a mying hpe Junipero ngu bai shamying la wu ai.
1737 ning hta Jau shatai Sacramentu hpe hkam la sai. Shi Jau tai wa ai shaning kawn 1749 ning du hkra Padua mare kaw na Dakkasu hta e Myit Sawn Sumaru Hpaji (Philosophy) hte Karai Hpaji (Theology) hpe sharin ya wu ai.
1750 ning, January shata praw (1) ya shani hta, Mexico mare kaw du ai kaw na si ai aten du hkra dai shara de nnan du shang wa ai “People of New World” masha ni hpe makam masham de bai gale shang wa hkra shakut kau da lai wa sai.
1768 ning hta Jau Serra gaw, Jesuit Jau Magam Gun Wuhpung ni hte seng ai shara ni shi kawn lit galai la ai. America Dan na Sinna panglai hkin-gau kaw Karai Kasang a mungga hkaw shachyam ya sai. Jau jawng ni grai law hkra hpaw hpang da ya sai. Dai ni kaw na 1770 ning hta Montholy Panglai hpung-gaw kaw hpaw da ya ai, Mission San Carlos Brromeo Jawng gaw, ya ten hta grai mying kaba nga ai Camel Mission Jawng rai nga ai. Shi a akyu hpyi shaja ai, yak hkak jam jau hkam sharang ai, shakut sharang ai kasi ni hpe mu nna Indian amyu sha ni law law Hkristan Makam Masham de du wa ma ai.
Jau Serra gaw, 1784 ning, August shata (28) ya shani, Madu kaw yup pyaw ban sa mat wa sai rai nga ai.
Shi n nga mat ai hpang, 1988 ning, September shata (25) ya shani, dai aten na Wa Sarabyin Yawhan Pawlu (II) kawn Shi hpe A Lu ai masha masat shagrau dat sai rai nga ai.
Dai hpang, 2015 ning, September shata (23) ya shani, dai aten na, ya du hkra anhte Nawku Hpung hpe woi awn hkawmsa nga ai, Wa Sarabyin Francis kawn, Shi hpe San Pra ai Masha dang dat let, shi a Poi Nhtoi hpe mung, July shata paw (1) ya shani masat shagrau dat ya sai rai nga ai.

By;
Sister Rose Angeline Maran Nang Doi (SFX)
RVA-Kachin Service (Myitkyina)