San Pra ai Jude a Poi Nhtoi (October 28) 28 October 2023

San Pra ai Jude a Poi Nhtoi (October 28)

San Pra ai Yuda (Jude) a mying madung, Thadeus nga ai re. Shi gaw, Madu Yesu a hte lawu lahta kahpu kanau daw ang ai wa rai nga ai. Bai nna, San Pra ai Yaku Kaji hte San Pra ai Sieon yan nau a kanau mung rai nga ai. Shi a kahpu San Pra ai Simeon hpe (62) ning hta, Yerusalem mare na Saradaw aya dang da ai shaloi, shi grai garum ya lai wa sai.

San Pra ai Yuda Thadeus gaw, Yuda (Judea) Mung, Samariya, Idumeya, Siriya, Mesopotemiya hte Libya Mungdan hkan Madu a Kabu Gara Shiga hpe hkawn shachyam shabra lai wa sai. Yuda hpung kaw nna gale shang wa ai ni hpe shagun laika langai mi ka nhtawm, shadum jahprang n gun jaw da ai hpe mu hti lu nga ai.

Shi gaw, Madu Yesu a Kasa marai (12) kaw malawm langai mi mung rai nga ai. Shara law law ni hta Kabu Gara Shiga hkawn shabra hkawm lai wa sai. Persia Mugdan kaw lawm ai, Armenia Mungdan de shang sa du ai gaw, San Pra ai Kasa Yuda Thadeus rai nga ai. Shi gaw, shut shai ai tara hkaw shabra ai Simonian ni, Nikolai ni, Gnostik ni hte n bung ai sha teng mai ai hku nna, Tara hkaw shabra wu ai. Shi a asak hte galai nna si hkam kau ya sai majaw, Armenia Mungdan gaw, tsa ban (3) hta Hkristian Mungdan byin tai wa sai rai nga ai.

San Pra ai Yuda Thadeus hpe “Myit Mada Shara n nga mat sai daram re ai ayak ahkak lam hta lak san kam shamyet lu ai, akyu hpyi garum ya lu ai San Pra ai masha” ngu nna hkap la da ai rai nga ai.

San Pra ai Yuda Thadeus a Labau kadun hpe hti hkaja la let, anhte marai hkum shagu mung, anhte a sak prat hkrun lam hta, jaw teng ai tinang a makam masham lam hte seng nna, gwi gwi rip rip hte sak se hkam lu ai ni tai lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)