San Pra ai Joseph a Poi Nhtoi (March 19)

Nu Maria hpe mahtan la ai wa, Madu Yesu hpe bau kaba ya ai San Pra ai Joseph gaw, Dawi hkawhkam a htinggaw kaw na rai nga ai. (Mahte 1:1-16). Nu Maria hpe shi mahtan la ai aten hta shi gaw, Nazaret mare kaw laksama bungli galaw nga wu ai. Mahtan da ai aten hta Nu Maria ma hkrum rai wa ai shaloi, Joseph gaw, Nu Maria hpe asim sha shabai kau na daw dan ai. Nu Maria gaya kahpa tai nna sat kau n hkrum na matu asim sha shabai kau maw nga ai. dinghku la n lu ai sha ma shangai ai amyu shayi hpe gaya kahpa jahkrum nna mara shagun ai hpang sat kau ai Yuda htung lai len nga ai.

Ya, shi ndai lam hpe naw myit aru yu nga yang, Madu a lamu kasa langai mi yupmang hta shi hpe hkum shadan dan nna, “Dawi a kasha Yosep e, Maria hpe hkungran la na matu hkum myitru et, hpa majaw nga yang, shi a na-um nasin gaw, dai Chyoi Pra Ai Wenyi a majaw byin wa ai rai nga ai. Shi gaw shadang sha shangai na ra ai rai nna, nang shi a mying hpe, Yesu ngu nna shamying lu na rai nga ai; hpa majaw nga yang, shi a amyu hpe tinang a yubak mara kaw na hkye hkrang la na shi rai nga ai,” ngu wu ai. (Mahte 1:20-21). Joseph mung, Lamu kasa matsun ai ga hpe madat mara let, Maria hpe shi a nta de woi wa mat ai.

Maria gaw, Hkye La Madu hpe shangai sai. Dai hpang, Lamu Kasa gaw, Joseph hpe yup mang hta “Herod gaw ma hpe sat kau na matu tam nga ai. Dai rai nna, rawt u, dai ma kaji hte shi a kanu hpe woi nna, I-Jip (shing n rai) Egutu mung de hprawng sa su; ngai nang hpe bai shaga ai ladaw du hkra, dai yang e anga nga su,” ngu nna tsun wu ai. (Mahte 2:13)

Herod hkawhkam si mat ai hpang, Joseph gaw ma yan nu hpe Nazaret mare de bai woi wa ai. Joseph a lam woi sharin matsun ai hte maren, Ma Yesu gaw, machye machyang hte shaman chyeju ni hta lani hte lani rawt jat wa sai; yu maya bungli rai nga ai Laksama bunli hpe mung sharin chye la wu ai. (Mahte 13:55)

San Pra ai Joseph hpe “Kaja ai Hku Si lu na matu Laksan Kam Shamyet lu ai San Pra ai wa” (Patron of a Good death) nga nna masat shagrau hkrum sai. Shi gaw, Nu Maria hte Madu Yesu a lata hta ngwi pyaw simsa let nsa hti mat wa sai re. Shi a si ai nhtoi hpe Madu Yesu tara grai n hkaw hkawm hpang ai ten, March shata (19) ya ngu masat hkrat wa ai rai nga ai.

San Pra ai Joseph hpe “Hkawsek ni hpe Makawp Maga ai Wa” (Protector of Virginity) ngu nna mung shing teng amying jaw let kam shamyet ai rai nga ai. Ndai lam gaw, San Pra ai Joseph gaw, shi a sak hkrung prat tup, Karai Kasang a Kanu, Nu Maria a sak hkrung lam tup makawp maga let hkungga y alai wa ai majaw rai nga ai. Bai nna, shi hpe “Nawku Hpung Ting Kam Shamyet ai San Pra ai Masha” (Patron of the Universal Church) nga nna mung masat let kam shamyet nga ga ai re. San Pra ai Joseph kaw kam hpa akyu hpyi manoi mana tai ni yawng, kaman lila kadai n byin nga ai.  

Daini Nawku hpung gaw, San Pra ai Joseph a Poi Nhtoi hpe galaw nga ga ai aten, grau nna, kun dinghku a Kawa tai nga ai ni yawng mung, tinang a kun dinghku dum nta masha ni hpe San Pra ai Joseph zawn makawp maga pawn ba la chye ai, kam hpa gying ai Kawa ni tai wa lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)