San Pra ai Josemaría Escrivá a Poi Nhtoi (June 26) 26 June 2023

San Pra ai Josemaría Escrivá a Poi Nhtoi (June 26)

San Pra ai Josemaría Escrivá gaw, Spain Mungdan, Barbastro Mare kaw, lai wa sai 1902 ning, January shata (9) ya shani shangai chyinghkai wa ai rai nga ai. Shi a chyinghkai kawa amu magam n lu mat ai shaloi shan nu wa ni gaw, Logrono mare de htawt nga ra mat ma ai. Logrono mare de sa du nga ai hpang lani mi na ten hta Josemaria gaw, hkyen prang kaw Tawra Jau langai mi a lagaw hkang hpe sa mu wu ai. Shaloi, Shi a myit hta Karai Kasang, shi hpe lama ma myit sumru shangun mayu sam ai, nga nna myit la wu ai.

Dai majaw, 1925 ning hta Shi Jau tai wa nna nam kahtawng langai mi kaw Jau magam gun hpai wu ai. dai hpang Hkansa Tara Janmau Hpaji (Doctorate in Law) sharin hkaja la na matu, Madrid mare de htawt magam gun nu ai. 1928 ning, October shata praw (2) ya shani, Jau Josemaria gaw, Opus Dei “Karai Kasang a Amu” Magam Gun Wuhpung hpe de hpang dat nu ai. Shi gaw, Madrid mare kaw na Dakkasu kaw mung laika hpaji sharin ya wu ai.

Spain mungdan, Madrid mare kaw, Nawku Hpung hpe zingri shamyit ai lam byin wa ai shaloi, Jau Josemaria gaw, lagyim nna Jau magam galaw nga nu ai. Jahtum e Madrid mare kaw nna yen nga mat ra nu ai. Dai aten gaw, Spain Mungdan kata dinghku majan mung byin taw ai ten rai nga ai. Dai majan ngut ai shaloi, Jau Josemaria gaw, Madrid mare de bai nhtang wa nna akyu hpyi myit sumru ai wutsawk hpe shara ra law law kaw Jau ni, Hpung Magam gun ni hte hpung masha ni a matu galaw ya nna, Opus Dei Karai Kasang a Bungli hpe ta tut galaw wu ai.

Dai hpang Jau Josemaría Escrivá gaw, Uropa dan hte Mexico mungdan de sa nhtawm, shani shagu sak hkrung lam hta san seng san pra rai nga ra ai amu, “Universal call to holiness in the realities of everyday life” hpe grai shakut let galaw gun hpai lai wa sai rai nga ai.

San Pra ai Jau Josemaria gaw, Roma mare de sa nhtawm, Karai Kasang a Hpaji (Theology) hte seng ai Hpaji Ninghkring Janmau lu la nu ai. Bai nna, Roma Mare na Magam Gun Wuhpung (2) “Two Vatican Congregation” a hpaji jaw lit magam hpe mung gun hpai lai wa sai rai nga ai. Sarabyin a Dakkasu “Pontifical Academy of Theology” hta mung woi awn wuhpung malawm tai wa sai sha n-ga, Wa Sarabyin Pius (12) a lak san shagrau ya ai, “Prelate of Honor” hpe mung hkam la lu sai rai nga ai.

Ndai zawn Karai Kasang a magam hta grai atsam dat let gun hpai hkawmsa nga ai aten, Jau Josemaria gaw, 1975 ning, June shata (26) ya shani, Roma mare kaw sha, Madu hta e yup pyaw ban sa mat wa sai rai nga ai.

Jau Josemaría Escrivá n nga mat ai hpang, 1992 ning, May shata (17) ya shani, dai aten na, San Pra ai Wa Sarabyin Yawhan Pawlu (2) kawn, Shi hpe A Lu ai Masha ngu masat shagrau dat ya sai rai nga ai.

Dai hpang, 2002 ning, October shata (6) ya shani hta, Wa Sarabyin Yawhan Pawlu (2) sha, Shi hpe San Pra ai Masha dang dat let, Shi a Poi Nhtoi hpe mung, June shata (26) ya shani masat shagrau dat ya sai rai nga ai.

Daini Nawku Hpung gaw, San Pra ai Jau Josemaría Escrivá a Poi Nhtoi hpe galaw nga ga ai aten hta, anhte  hpung masha ni a prat hta mung, kadun la ai prat hta, tinang chye ai hpaji atsam, n-gun atsam ni hte Nawku Hpung kata dang lu ai made shang tsap garum lu ai ni byin tai lu hkra shakut sa wa nga ga law. 

By;

Sister Rose Angeline Maran Nang Doi (SFX)

RVA-Kachin Service (Myitkyina)