San Pra ai Josaphat a Poi Nhtoi (November 12) 12 November 2023

San Pra ai Josaphat a Poi Nhtoi (November 12)

San Pra ai Josaphat gaw, “Hkristian Hpung shagu myit hkrum myit ra lam hte seng nna kam hpa lu ai San Pra ai Masha” rai nga ai. Shi gaw, 1580 ning hta, Ukrian Mungdan kaw shangai wa ai rai nga ai.

Vilna mare kaw, shi amu galaw nga ai aten hta shi a Lauban wa gaw, shi hte rau arang shapraw nna amu galaw na matu, shi a ma num kasha ni kaw na shi ra ai langai ngai hpe jaw sha na, nga nna bawng wu ai. Raitimung, shi gaw, Tawra Jau tai na matu myit daw dan da sai hte maren, lauban wa a bawng ban ai lam hpe myit n hkrum lawm ai. Dai majaw, 1604 ning hta, shi gaw Vilna mare kaw na, San Pra ai Trinita Jau tai jawng de shang mat wa nu ai.

Josaphat shi Jau tai wa ai shaloi mung, n dan n dawng ai hku nga na matu tara shadik let nga ai. Kahtawlik Nawku Hpung hte Orthodox Nawku Hpung hpe myit mang langai sha tai na matu shadut shadum ya ai. 1617 ning hta, Jau Josaphat gaw, Polotsk mare kaw na, Saradaw tai wa sai. Shi gaw tara ga sharin ai laika buk nnan shapraw ai hte Jau ni a nga sat nga sa lam hpe gram hpajang ai amu ni hpe madung tawn galaw lai wa ai. Sinpraw dan na, Orthodox hpung a hkansa tara “Eastern Canon Law” gaw dinghku de sai wa hpe Jau aya hkam ya lu nga ma ai.

Ndai lam hte seng nna, Saradaw Josaphat gaw, dinghku n de ai sha Jau tai na matu shadut ai majaw, shi a matsun sharin ai lam ni grai awng dang wu ai. Dai majaw, Orthodox hpung masha ni gaw, Saradaw Josaphat  hpe grai n ju ma ai. Saradaw Josaphat hpe mung, “Wenyi Lagut” nga nna jahpoi asawng lai wa ma ai. San Pra ai Saradaw Josaphat chyawm gaw, “Roma Nawku Hpung hte Langai sha byin wa ra ai lit hte San Petru a ahkang aya gaw yawng a matu langai sha rai nga ai” ngu ai myit jasat rawng ai majaw, “Ngai gaw, asak si hkam na matu jin jin rai nga n ngai” nga nna mahtai bai jaw dat wu ai.

1623 ning, November shata (12) ya jahpawt, San Pra ai Josaphat gaw, akyu hpyi na matu nawku jawng de sa wa ai shaloi, n hkru n kaja ai ni gaw shi hpe lam kaw rim la n htawm sinat hte gap sat kau ma ai.

Saradaw Josaphat n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, Shi gat sat hkrum ai, November shata (12) ya shani ngu nna, masat shagrau dat ya sai rai nga ai.  

Daini Nawku Hpung gaw, San Pra ai Josaphat a Poi Nhtoi hpe galaw nga ga ai aten, anhte a Prat hta mung, Karai Kasang Wa a shaga la ai nsen hpe galoi mung madat nga let, Madu e, na a matu jin jin rai nga n ngai, ngu nna htan lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)