San Pra ai John Ogilvie a Poi Nhtoi (March 10) 10 March 2023

San Pra ai John Ogilvie a Poi Nhtoi (March 10)

 

San Pra ai John Ogilvie gaw, Scotland Mugndan kaw na, Lusu ai kun dinghku kawn 1569 ning hta shangai chyinghkai wa ai rai nga ai. Shi gaw, Kahtawlik Nawku Hpung kaw nna ginhka pru mat wa ai Calvin Hpung kaw nga kaba wa ai. Dai aten hta Hkristan hpung ni shada da garan kachyan hkat ai mara a majaw, Nawku HPung zingri hkum nga ai hpe shi chye na wu ai.

Kahtawlik Nawku Hpung Masha ni gaw, tinang a makam masham a matu tinang a asak hpe n lahpawt ai sha zingri shamyit hkrum nga shajang ai hpe shi ta tut mu lu ai. Ndai makam masham a share shagan ni hpe yu n gun lu ai majaw, asak (17) ning sha naw re ai, John Ogilvie gaw, Kahtawlik Makam Masham hpe sa lata la wu ai.

San Pra ai Ogilvie gaw, Kahtaw Nawku Hpung kawn hpaw da ai laika hpaji sharin jawng ni law law kaw sa du sharin la lai wa ai. Dai hpang, Jesuit Magam Wuhpung de shang mat wa nna, 1640 ning hta Paris mare kaw na e, Jau tai Sacrametu hpe hkam la lu sai rai nga ai.

Jau John Ogilvie shakut shaja ai lam a majaw Paris mare, Landon mare hte Scotland mungdaw kaw na masha ni law law gaw, Kahtawlik Makam Masham de gale shang wa masai.

Shi a sharin shaga ai lam hta, “Sarabyin gaw, wenyi hte seng nna ningbaw majing re, wenyi hte seng jang hkawhkam gaw ningbaw n re, nga nna sharin shaga ai hte Protestant hpung masha law law hpe Kahtawlik makam masham de woi jashawn la lu ai majaw, sat kau na matu jeyang hkrum nu ai. Shi hpe htawng sharawng da ai shaloi uphkang du ni gaw, Kahtawlik Hpung masha ni hpe kadai dai re ngu san yang, tsep kawp n tsun dan ai majaw, shi hpe grau zingri shatsang ma ai.

Hpang jahtum 1615 ning, March shata (10) ya shani hta gaw, Glasgow mare kaw shi hpe gyit noi sat kau ma ai.

Shi n nga mat ai hpang, Nawku Hpung gaw, shi hpe San Pra ai Masha dang dat let, shi a Poi Nhtoi hpe mung, March shata (10) ya shani masat shagrau dat ya sai rai nga ai.

Daini Nawku Hpung gaw, San Pra ai Jau John Ogilvie a Poi Nhtoi hpe galaw nga ai hte maren, anhte hpung masha marai shagu mung, tinang lu da sai Hkristan makam hpe manu shadan let, Madu a Kabu Gara Mungga hpe n lu hkap la shi ai Hpunau ni hpe sakse hkam lu ai ni byin tai lu hkra shakut sa wa nga ga law.

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

 

Add new comment

3 + 3 =