San Pra ai John Gualbert a Poi Nhtoi (July 12)

San Pra ai John Gualbert gaw, Florence mare hta e, lai wa sai A.D (985) ning daram hta shanga chyinghkai wa ai rai nga ai. Shi asak ram wa ai hte rau, moi na Hkristan hpaji hpe sharin hkam la lu sai raitim, mungkan a pyaw letn lam hte mara kata kaw nga lai mat wa sai. Shi a prat mahkrum madup langai mi gaw shi a myit hpe galai shai kau ya sai.

Shi a langai sha rai nga ai Kahpu Hugo hpe sat kau ai wa hpe madat htang sat kun a matu myit jakut da wu ai. Shi a Kahpu hpe sat kau ai wa hpe sat na matu sa wa ai Chyoi Pra ai Manga Ya nhtoi hta tai hpyen wa gaw, “Shing gyim masha ni a matu nni nkri yubak hkam lai wa sai, Madu Yesu a mying ning sang hta shi hpe mara raw ya na matu” hpyi nem wu ai. Shloi dai masha hpe grai matsan dum myit rawng wa nna mara raw hkyam sa jaw ya wu ai. Dai hpang, Nawku jawng kata de shang nhtawm, Karai Kasang kaw shi a mara ni a matu, hpyi nem tawng ban wu ai.

San Pra ai John Gualbert gaw, tara shakut ai lam hta, grai rawt jat wa ai hpang, Benedictine Tawra Jau Wuhpung de shang mat wa ai. Dai magam gun wuhpung a ningbaw Abbot n nga mat ai hpang shi hpe ningbaw lit shatsam ma ai raitimung, shi n hkap la wu ai. Asim sha rai tara shakut nga mayu ai majaw, dai Tawra Jawng kaw nna pru mat wa ai. Tuscany ginwang Valle Ombrosa shara kaw na kaga Tawra Lahkawng hte rau nta kaji gap let tara shadik nga mat ai.

Shi gaw, Order of Vallombrosa Magam Gun Wuhpung hpe hpang da timung, uphkang aya kaba shatam ai shaloi shagrit shanem ai myit hte n hkap la wu ai. Shi kaw garum sa hpyi ai ni kadai hpe mung lama ma n lu ai n wa ga ma ai. Shi nga ai ginwang na jawng ni hpe gram ra ai lam ni gram ya ai. Nawku arung arai dut sha ai n kaja ai lai len re hpe grai ning hkap y alai wa sa ai.

San Pra ai John Gualbert gaw, 1073 ning, July shata (12) ya shani, Madu hta e yup pyaw ban sa mat wa sai rai nga ai.

Shi n nga mat ai hpang, 1193 ning, October shata (24) ya shani hta, dai aten na Wa Sarabyin Celestine (III) kawn shi hpe San Pra ai masha dang dat let, shi a Poi Nhtoi hpe mung, July shata (12) ya shani masat shagrau dat ya sai rai nga ai.

By;

Sister Rose Angeline Maran Nang Doi (SFX)

RVA-Kachin Service (Myitkyina)