San Pra ai John Gabriel Perboyre a Poi Nhtoi (September 11)

San Pra ai John Gabriel gaw, makam masham a majaw zingri shatsang ai amyu shagu hte, jahkrit shama rai sat kau hkrum ai lam hte seng nna kasi rai nga ai. Shi gaw Francis mungdan, Puech mare kaw 1802 ning, January shata (6) ya shani hta Jau tai wa ai. Shi gaw Jau tai jawng kaw Theology "Karai Kasang a Hpaji" sharin sara, Jau tai jawng up, Paris mare na jau jawng kaw ningtau lit hkam dang da ai hkrum lai wa ai.

San Pra ai John Gabriel hpyi shawn ai majaw, Miwa mungdan de sasana magam gun shangun hkrum wu ai. Hunang mare kaw ginjaw galaw tawn nhtawm, tara maigan ni hte Hkristan Hpung shang n re ai ni hpe Karai Kasang a Mungga hkaw sharin ya ai. Akyu hpyi shaja ai hte, ru yak jamjau hkam sharang ai majaw, shi gaw kabai da hkrum ai ma ni hte tara maigan masha law law hpe makam masham nhtoi jaw ya nna, makam masham de woi jashawn la lu sai.

San Pra ai John Gabriel nga ai shara kaw, makam masham a majaw zingri shatsang ai lam byin wa nna shara kaga de htawt nga ai. Tara laika sharin nga ai masha langai mi e, shi a lam asuya ni hpe sa tsun dan ai majaw, shi rim hkrum ai hpang zingri shatsang ai hkrum nu ai. Kade zingri shatsang hkrum timung, shi a makam masham hte Hkristian masha ni a ntsa e sadi dung ai.

1840 ning September shata 11 ya shani, shi a asak (38) ning hta, shi hpe du manat sat kau ma ai.

San Pra ai John Gabriel n nga mat ai hpang, 1889 ning, November shata (10) ya shani, dai aten na, Wa Sarabyin Leo (XIII) gaw, shi hpe A-lu ai masha hku nna masat dat sai rai nga ai.

Dai hpang, 1996 ning, June shata praw (2) ya shani gaw, dai aten na, Wa Sarabyin Yawhan Pawlu (II) kawn shi hpe San Pra ai masha dat dat let, shi a Poi Nhtoi hpe mung, September shata (11) ya shani ngu masat dat ya sai rai nga ai.

Daini San Pra ai Jau John Gabriel Perboyre a Poi nhtoi hpe galaw nga ai hte maren, tinang lu da sai makam masham hpe kaga hpunau ni hpe mung, gam garan jaw ya lu na atsam hpe jaw ya rit ga matu, akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)