San Pra ai John Gabriel Perboyre a Poi Nhtoi (September 11)

Alu ai John Gabriel gaw, makam masham a majaw zingri shatsang ai amyu shagu hte, jahkrit shama rai sat kau hkrum ai lam hte seng nna kasi rai nga ai. Shi gaw Francis mung Puech mare kaw 1802 ning hta shi jau tai wa ai. Shi gaw jau tai jawng kaw Theology "Karai Kasang a Hpaji" sharin sara, Jau tai jawng up, Parismare na jau jawng kaw ningtau lit hkam dang da ai hkrum lai wa ai.

Shi hpyi shawn ai majaw, Miwa mung de sasana magam gun shangun hkrum wu ai. Hunang mare kaw ginjaw galaw tawn nhtawm, tara maigan ni gte Hkristan Hpung shang n re ai ni hpe Karai Kasang a Mungga hkaw sharin ya ai. Akyu hpyi shaja ai hte, ru yak jamjau hkam sharang ai majaw, shi gaw kabai da hkrum ai ma ni hte tara maigan masha law law hpe madam masham nhtoi ya lu nna, madam masham de woi jashawn la lu ai.

Shi nga ai shara kaw, makam masham a majaw zingri shatsang ai lam byin wa nna shara kaga de htawt nga ai. Tara laika sharin nga ai masha langai mi e, shi a lam asuya ni hpe sa tsun dan ai majaw, shi rim hkrum ai hpang zingri shatsang ai hkrum nu ai. Kade shatsang hkrum timung, shi a makam masham hte Hkristian masha ni a ntsa e sadi dung ai.

1840 ning September shata 11 ya shani, shi hpe du manat sat kau ai kaw alu ai John Gabriel Pertboyre gaw shi a mungkan asak jahtum kau sai.

1889 ning hta San Pra ai Jau John Gabriel Perboyre hpe San pra Masha ngu nna masat shagrau da ya sai.

Daini San Pra ai Jau John Gabriel Perboyre a Poi nhtoi hpe galaw nga ai hte maren, tinang lu da sai makam masham hpe kaga hpunau ni hpe mung, gam garan jaw ya lu na atsam hpe jaw ya rit ga matu, akyu hpyi la nga ga law.

 

By;

Sister Rose Angeline Maran Nang Doi (SFX)

RVA-Kachin Service (Myitkyina

Add new comment

13 + 4 =