San Pra ai John Fisher hte Thomas More Yan a Poi Nhtoi (June 22) 22 June 2022

San Pra ai John Fisher hte Thomas More Yan a Poi Nhtoi (June 22)

Ndai San Pra ai Masha Yan gaw, English Hkawhkam Henry (8) e zingri sat shamyit kau hkrum ai English amyu sha ni kaw na mying kaba ai San Pra ai masha yan rai nga ai. Ndai mabyin gaw, (1527) ning hta Henry Hkawhkam (8) gaw, (18) ning tup shi a madu jan tai nga ai Argon na Catherine hte hka nhtawm Fransik mungdan na, Anne Boleyn hpe la na ahkang, Wa Sarabyin Clement (7) tsep kawp n jaw ai majaw, Henry hkawhkam gaw, Nawku Hpung kaw nna pru mat wa nhtawm Nawku Hpung hpe zingri shamyit ai lam galaw wa ai.

Hkaw hkam Henry gaw, Ahkaw Ahkang Kaba “Act of Supremacy” hpe asung jashawn la nna shi hkum shi Anglican Hpung a ningbaw shatai la wu ai. England Mungdan kaw na, Kahtawlik Makam Masham hpe matut hkap la ai ni hpe laja lana zingri ai, hpri chyinghkyi ni hte hkum shan ni hpe mahkyit la kau ai, nkau mi hpe gyit noi sat nna, nkau gaw majing malang asak hkrung nga ai kaw na pu sindai ni shaw kau ya ma ai. England Mungdan kaw na Kahtawlik Hpung masha ni hpe ndai zawn zingri sat ai Hkawhkam Henry a hpang hkan ai ni gaw masha myit nan n rawng ai masha mazut ni tai wa masai.

San Pra ai John Fisher gaw, 1469 ning, October shata (19) ya shani, England Mungdan, Beveley, Yorkshire hta e shangai chyinghkai wa ai rai nga ai. Rochester Mare na Saradaw John Fisher gaw, Hkawhkam Henry shi hkum hpe Anglican Hpung a Ningbaw shatai ai hpe n madi shadaw ya ai majaw, London mare na Langchyi “London Tower” htawng kaw sharawng da ai hpang, 1535 ning, June shata (22) ya shani hta baw kahtam di sat kau hkrum sai. Saradaw John Fisher a baw hpe London mahkrai “London Bridge” ntsa shawa ni mu lu nna jahpoi ya na matu nhtoi ram ram na hkra mara tawn da ma ai. San Pra ai Saradaw John Fisher gaw, Chyum Laika hpe jum da nna, shi hpe zingri sat ai ni hpe mara raw ga tsun nhtawm nsa hti mat wa sai rai nga ai.

Shi n nga mat ai hpang, 1886 ning, December shata (29) ya shani, Shi hpe dai aten na Wa Sarabyin Leo (13) kawn A Lu ai Masha hku nna masat shagrau dat sai rai nga ai.

Dai hpang, 1935 ning, May shata (19) ya shani hta, shi hpe e, dai aten na Wa Sarabyin Pius (11) kawn San Pra ai Masha dang dat let, Shi a Poi Nhtoi hpe mung, June shata (22) ya shani ngu masat shagrau dat ya sai rai nga ai.

Bai, San Pra ai Thoams More gaw, 1478 ning, February shata (7) ya shani hta England Mungdan, London Mare kaba hta e shangai chyahkai wa ai rai nga ai.

San Pra ai Thomas More gaw, Karai Kasang hpe she madat na, Hkawhkam a ga hpe gaw n madat lu ai ngu htang tsun ai. Hkawhkam Henry a madu jan hte hka na hpe tsep kawp myit n hkrum ai makam masham kaba ai tara agyi kaba langai mi rai nga ai. Manga ning na ai hpang 1527 ning hta shi gaw Kahtawlik Hpung kaw na pru na malai shi hpe lit shatsam da ai hkawhkam a tara rung kaw na pru mat wa ai. Dai majaw, shi hpe mung hkawhkam myit ra n hkan ai nga nna 1535 ning, July shata (6) ya shani hta gaw, baw kahtam daw sat kau ma ai. Shi si wa mahka e hpang jahtum “Ngai gaw, Karai Kasang a magam gun shawng tai ai hpang she hkawhkam a magam gun re.” (I am the king’s servant, but God’s First) nga tsun kau da wu ai.

Shi n nga mat ai hpang, Nawku hpung kawn Shi hpe San Pra ai Masha dang dat let, Shi a Poi Nhtoi hpe mung, June shata (22) ya shani ngu masat shagrau dat ya sai rai nga ai.

Daini Nawku Hpung gaw, San Pra ai John Fisher hte Thomas More Yan a Poi Nhtoi hpe galaw nga ga ai aten hta, anhte Hpung Masha ni mung, tinang kalang mi lu da sai Makam Masham hpe kaning re ai aten hta raitim, nyet kau ai lam n nga ai sha, gwi gwi sakse hkam lu ai ni byin tai lu hkra shakut sa wa nga ga law.

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

Add new comment

16 + 0 =