San Pra ai John Boste, George Swallowell hte John Ingram Ni a Poi Nhtoi (July 24)

1594 ning hta, makam masham a majaw sat kau hkrum ai, San Pra ai John Boste, George Swallowell hte John Ingram ni hpe, Durham Na Share Shagan Marai (3) Durham Martyrs ni ngu shamying shagrau ai rai nga ai. Shanhte gaw, makam masham a majaw, England Mungdan, Durham mare makau hta Nawku Hpung hpe masha myit n rawng ai n hkru n kaja ai masha ni sat zingri shamyit ai aten sat kau hkrum lai wa ai rai nga ai.

San Pra ai John Boste gaw, Oxford mare na, Hkawhkam Jan a Dakkasu, Queen’s College kaw 1544 ning hta hpaji sharin hkam la lai wa sai. Shi a asak (22) ning hta Dakkasu kaw shi mying kaba ai, atsam ningtawn ai arawng ni yawng hpe shingdu gayin kau da nhtawm Kahtawlik Nawku Hpung de gale shang mat wa ai.

1580 ning hta shi Jau tai wa nna, England mungdan kaw Sasana magam gun lai wa ai. England Mungdan dingdung maga na ningbaw kaba rai nga ai, Huntington ginwang uphkang du gaw, Jau John Boste hpe kaga Jau ni hta grau nna mayam shatai na matu, rim la kau na matu gyam nga ma ai. Shi hpe London Langchyi de masu woi mat wa nhtawm, shi a manang ni a lam tsun dan na matu lagyim san let zingri shatsang ma ai. Shi hpe Durham de bai dat dat nhtawm lagyim jep shatsang timung, tsep kawp n tsun dan ai.

Protestan hpung up kawn Kahtawlik Nawku hpung de bai gale shang wa ai George Swallowell hpe mung, Jau John Boste hte rau jep shatsang ma ai. George Swallowell gaw, tara rung kaw shi a Kahtawlik Makam masham hpe sha hkap la ai lam asan sha tsun ai shaloi, Jau John Boste shi hpe “Shawa mara raw hkrang” hte shaman ya ai. Dai hpang, nhtoi kade nna yang, George hpe Darlington mare kaw sat kau ma ai.

Jau John Boste hpe gaw, 1594 ning, July shata (24) ya shani tara jahkrat nna Durham mare shinggan na, Dryburm shara kaw jeyang sat kau ma ai.

Durham mare kaw sat hkrum ai ni hta Jau John Ingram mung lawm nga ai. Jau John Ingram gaw, Nawku Hpung de gale shang wa ai hpang Oxford mare na New College, Rheims hte Roma mare na Dakkasu ni hta laika hpaji sharin la lai wa ai. 1589 ning hta Jau tai wa nna, 1592 ning hta Scotland de sasana magam gun na matu lit shatsam hkrum sai. 1593 ning hta Jau Ingram hpe rim la nna, London mare de shalai dat ma ai. Shi hpe laja lana zingri shatsang ma ai raitimung shi a manang ni hpe shi sadi dung ding yang rai nga wu ai. Jau John Boste sat kau hkrum ai hpang lahkawng ya na ai hpang Jau John Ingram hpe mung jen noi dat, garawt hkawm dat, gyit hkang dat rai nna zingri shatsang sat kau ma ai.

Ya na zawn rai na, Makam Masham a majaw, sat kau hkrum lai wa sai, San Pra ai Jau John Boste, George Swallowell hte Jau John Ingram ni a Poi hpe Nawku Hpung kawn July shata (24) ya shani, shaning shagu shakawn shagrau ya nga ai rai nga ai.

By;

Sister Rose Angeline Maran Nang Doi (SFX)

RVA-Kachin Service (Myitkyina)