San Pra ai John Bosco a Poi Nhtoi (January 31) 31 January 2023

San Pra ai John Bosco a Poi Nhtoi (January 31)

San Pra ai John Bosco gaw, Salesian Magam Gun Wuhpung hpe de hpang dat ya ai San Pra ai Masha rai nga ai. Shi gaw, Italy Mungdan, Turin Mare kaw lai wa sai 1815 ning, August  shata (15) ya shani hta shangai chyinghkai wa sai rai nga ai. Kanu yan Kawa gaw, matsan ai ni rai ma ai.

Shi a asak (9) ning du ai shaloi, yupmang langai mi mu wu ai. Dai yupmang hta ma kaji law law hpe shi mu wu ai. Ma kaji dai ni gaw, matse labye dusat nsam sam dat, sagu kasha nsam sam dat rai shi hpe madun nga ma ai. Bai nna, Nu Maria gaw, shi a baw ntsa e lata mara da nhtawm: “Bosco e, ya nang mu ai n hkru n kaja ai dusat ni hte nye a ma kaji ni hpe nang shading sharai ya u.” nga nna lit shatsam ya ai.

Dai majaw, Bosco gaw mare kata na ma kasha ni hpe kahkyin la nhtawm, tara laika sharin ya ai, gumhtawn gumlawt ai ginsup hpa ni, Circus ginsup hpa ni hpe sharin la let shapyaw nga wu ai.

John Bosco, shi a asak (16) du ai shaloi, Chieri Mare kaw na Jau tai jawng de sa shang ai. Shi a jawng dung Jau gaw, Bosco a makam masham myit jasat hpe chye yu da nu ai. Hpa majaw nga yang, Nawku Jawng kaw Jau tara hkaw ai hpe Bosco gaw, hkrak tup bait sun da lu nga ai.

John Bosco gaw, 1814 ning hta, Jau tai ai Sacramentu hpe hkam la lu ai hpang Turin mare kaw lit shatsam ya hkrum ai. Jau Bosco gaw, dai mare kaw na htawng masha ni, lam ntsa kaw dam hkawm ai ramma ni hpe madung tawn nna sharin shaga ya ai. Shanhte nga na matu, San Francis de Sales mying ai ginra langai mi gaw gap ya nna sharin shaga ya ai. Dai ginra kaw shanhte hpe lata amu ni, Hkristan ngasat ngasa hte seng ai hpaji, myit su kung hpan myit jasat hpaji, Hkyep din chywi ai hpaji hte Htangdip hpaji ni hpe sharin achyin ya ai. Shi gaw, matut mahkai hpaji a ahkyak ai lam hpe chye ai majaw, shana ten ka-ang hkup ram hpe Magazine hte Laili laika ni hti nna aten shama ma re ai.

Jau John Bosco gaw, 1859 ning hta San Pra ai Francis de Sales hpe Wuhpung a Ningbaw shatai nhtawm, Don Bosco Magam Gun Wuhpung rai nga ai (Salesians Wuhpung) hpe de da ya nu ai.

1872 ning hta San Pra ai Mary Mazzarello hte rau “Hkristan ni a Nrum Ntau Nu Maria a Shayi Sha ni” ngu ai (Daughters of Our Lady Help of Christians) ngu ai Magam Gun Wuhpung hpe de da ya sai rai nga ai.

Jau John Bosco gaw, 1888 ning, January Shata (31) ya shani hta Madu kaw yup pyaw ban sa wa sai rai nga ai.

Jau John Bosco n nga mat ai hpang, 1929 ning, June shata praw (2) ya shani, dai aten na, Wa Sarabyin Pius (XI) kawn Shi hpe A Lu ai masha ngu masat shagrau dat ya sai rai nga ai.

Dai hpang, 1934 ning hta, April shata praw (1) ya shani hta gaw, Wa Sarabyin Pius (XI) sha, Shi hpe San Pra ai Masha dang dat ya let, Shi a Poi Nhtoi hpe mung, January shata (31) ya shani masat shagrau dat ya sai rai nga ai.

Daini Nawku Hpung gaw, San Pra ai Jau John Bosco a Poi Nhtoi hpe galaw nga ga ai aten, anhte Myanmar Mungdan hta Mungkan Mungdan shara shagu hkan magam gun taw nga ai, Salesians Jau, Mama, Brothers ni hte Salesians Magam Gun Wuhpung Shang masha ni yawng a matu lak san akyu hpyi garum ya nga ga. Anhte a sak prat hkrun lam tup hta mung, matsan jam jau hkrum nga ai, grau nna Ramma ni, Kanu Kawa n lu mat sai ma kaji ni a prat shawng lam hta hpaji chye wa lu na matu, myit su kung hpan wa lu na matu sharin shapan ya ai magam yin gam hta shang lawm lu ai ni byin tai lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)