San Pra ai John Berchmans a Poi Nhtoi (November 26) 26 November 2023

San Pra ai John Berchmans a Poi Nhtoi (November 26)

San Pra ai John Berchmans hpe “Misa tau ai ma ni a lak san kamhpa mai ai San Pra ai masha” ngu nna masat da nga ai. Shi gaw, Belgium mungdan, Diest mare kaw, lai wa sai 1599 ning, March shata (13) ya shani, shangai chyinghkai wa ai rai nga ai. John Berchmans a Kanu yan Kawa gaw, bungli galaw sha ai ni rai nna, Kawa gaw, hkyep-din chywi gram ai amu galaw ai wa rai nga ai.

John Berchmans gaw, Jau tai jawngma ni hpe yu ai Jau a lata kaw masum ning nga ai hpang, Mechlin mare ne Jesuit Jau ni a Kawlik nnan de sa lung mat ai. 1616 ning hta shi gaw Jesuit Jau ni a Novitiate ngu ai shaman shakyang ai tsang kaw du lu nu ai.

John Berchmans gaw, kaji ai aten kaw na, san seng san pra lam hte ruyak jam jau hkam sharang ai myit jasat rawng ai wa rai nga ai. Shi gaw, Roma mare de laika matut sharin la lu na matu, (10) ya tup lagaw lam hte hkawm sa lai wa sai. Ayak ahkak hkam nna, masha ni hpe hkye mawai la ai akyu tam lai wa sai mung rai nga ai. Jawng kaw mung, Jesuit Jau tai jawngma ni a matu kasi kamang tai ya ai. Shi gaw, akyu hpyi ai lam hta shakut shaja ai, bungli galaw shakut ai, Nu Maria hpe kam shamyet ai, laika hpaji lam hta kung zet ai hte ga shaga mung grai byin ai wa rai nga ai.

Shi gaw, Jau tai jawng kaw, myit sawn sumri hpaji (Philosophy) hpe masum ning sharin la nga ai laman, shinggan kaw na masha ni hte ga shaga shing jawng na matu lata la hkrum wu ai. Raitimung, shi machyi kaba hkrum mat nna, ngut kre hkra n lu shing jawng kau nu ai.

San Pra ai John Berchmans gaw, 1621 ning, August shata (13) ya jahpawt, shi a asak (22) ning sha naw rai yang, Rosary kachyi, Wudang kachyi hte Jesuit Jau ni a hkansa ritkawp tara laika buk hpe sinda kaw mara tawn nhtawm, “Ndai gaw, nye a sut gan majing ni rai nga ai; ndai sut gan ni hte rau ngai gaw kabu gara let si mat wa na ni ai” nga nna tsun ngut ai hpang Madu kaw yup pyaw ban sa mat wa sai rai nga ai.

Shi n nga mat ai hpang, 1865 ning, May shata (28) ya shani hta, A Lu ai Masha ngu nna masat shagrau dat ya sai. Dai hpang, 1888 ning, January shata (15) ya shani hta San Pra ai Masha dang dat let, Shi a Poi Nhtoi hpe mung, November shata (26) ya shani ngu, masat shagrau dat ya sai rai  nga ai.

Daini Nawku Hpung gaw, San Pra ai John Berchmans a Poi Nhtoi hpe galaw nga ga ai ten, San Pra ai John Berchmans gaw, asak kaji tim, Makam Masham lam hta grai shakut hkan sa lai sai hte shi Jau tai jawngma manang ni a matu mung, kasi kaja tai lai wa sai rai nga ai. Dai majaw, Shi a kasi ningli ni gaw, anhte hpung masha ni a matu mung kasi la hpa nan rai nga ai law.

By;

Sister Rose Angeline Maran Nang Doi (SFX)

RVA-Kachin Service (Myitkyina)