San Pra ai Jerome a Poi Nhtoi (September 30) 30 September 2023

San Pra ai Jerome a Poi Nhtoi (September 30)

San Pra ai Jerome gaw, Chyum Laika gale ka ai ning hkring kaba, (greatest translator of the Bible) rai nga ai. Shi gaw, A.D 340 ning hta Dalmatia mare hta, shangai chyinghkai wa ai rai nga ai. Shi a asak (18) ning hta Roma mare hta e, kashin kamun Sakramentu hkam la lai wa ai. Shi gaw, tara maigan sara ni kaw nna, laika ka hkrang hte ladat ni, grammar ni hpe sharin la ai; ga shaga ninghtawn htum Cicero hpe shi grai ra sharawng ai.

A.D 374 ning na nhtoi lani mi hta shi grai machyi sawng nga yang, Karai Kasang a tara ting nyang man kaw du mat wa ai. Karai Kasang gaw, shi hpe “Nang kadai rai ta?” nga nna san ai. Shaloi shi gaw: “Ngai gaw Hkristian langai mi re.” ngu nna bai htan dat ai. Shaloi Karai Kasang gaw, “Nang masu ai wa re. Nang gaw, Cicero hpe myit jung nga ai wa she rai ndai, kaning rai nme law, na a sutgan nga ai kaw, na a myit masin salum nga nga ai.” nga nna tsun pru wa ai.

Ndai mabyin a hpang kaw nna Jerome gaw, Madu a amu magam gun hpai na matu myit dawdan kau wu ai. Shaning ram ram na hkra Syria mungdan na, Zaibru jang kaw tawra tai nna tara shakut lai wa ai. Shi Jau tai wa ai hte Sarabyin Damasus gaw shi a rung na Amu Madu shatai na matu Jau Jerome hpe Roma mare de shaga la wu ai.

Shi a grau sharu chye ai myit jasat hpe hkang na matu hte agung alau ni hpe ninghkan lu na matu shi gaw Hebrew laika sharin nna Chyum Laika sharin achyin la na myit jahkut wu ai. A.D 385 ning hta Jau Jerome gaw, lungpu hku langai mi kaw sa nga nhtawm, Chyum Laika hpe Latin ga hte gale hpang ai. Dai Chyum Laika gaw, daini na aten du hkra Kahtawlik Nawku Hpung a matu, madi shadaw tawn da ai langai sha re ai, Chyum Laika Gale “Vulgator or Popular edition” rai nga ai. Isaiah a laika hte seng nna, “Chyum Laika hpe n chye ai gaw, Hkristu hpe n chye ai rai nga ai.” The ignorance of Scriptures is ignorance of Christ nga nna ka da nga ai.

A.D 410 ning hta masha shazai amyu ni gaw, Roma mare hpe htim zing la kau ma ai. Mare masha law law gaw, Betalehem mare de hprawng yen nga mat shajang ma ai. Dai shaloi, Jau Jerome gaw shi galaw nga ai laika hte seng ai bungli ni hpe tawn da nhtawm, dai hpyen yen ni hpe garum jaw let: “Daini na aten hta gaw, anhte Ja Chyum Mungga hpe ta tut bungli nan shatai nna gale ra saga ai.” nga nna tsun wu ai.

San Pra ai Jerome gaw jamjau hkam ai hte bungli galaw shaja ai majaw, A.D 420 ning hta Madu kaw yup pyaw bansa mat wa sai rai nga ai. Shi hpe “Laika hti Htingnu Bungli galaw ai ni kamhpa lu ai sanpra ai masha” Patron of Librarians, nga nna masat shagrau ai rai nga ai.

Daini Nawku hpung kaw nna, San Pra ai Jerome a Poi Nhtoi hpe galaw nga ga ai hte maren, anhte mung, San Pra ai Jerome zawn, mungkan masha ni yawng a matu akyu hpyi rawng ai magam bungli galaw shakut shaja mayu ai myit jasat anhte marai hkum shagau hta mung bang la nga ga law.

Sister Rose Angeline Maran Nang Doi (SFX)

RVA-Kachin Service (Myitkyina)