San Pra ai Jau Roderick a Poi Nhtoi (March 13)

San Pra ai Jau Roderick a Poi Nhtoi (March 13)

San Pra ai Roderick gaw, lai wa sai tsa ban (9) hta Spain Mungdan kaw e, Moors amyu sha up hkang nga ai ten hta sak hkrung nga lai wa ai Jau langai mi rai nga ai. Shi gaw, Hkristan Makam Masham hte seng nna, yak hkak jam jau ni a lapran hta, shi sat kau hkrum lai wa sai, A.D 875 ning du hkra n hkrit n tsang shakut shaja let, Hkristan makam masham hpe ja ja rai nna makawp maga lai wa ai Jau mung rai nga ai.

Shi hta e, kahpu lahkawng nga ai. Langai mi gaw, Moslem hpung shang masha, langai mi gaw, makam masham hpe kabai kau ai hpung htak wa rai nga ai. Shi gaw, kahpu yan e zingri shatsang ai kata kaw nga lai wa sai. Kahpu yan hkawng byin ai mang hkang kaw e sa je hparan ya ai shaloi, kahpu lahkawng yen shi hpe jawm gayet da ai hpe hkrum wu ai. Moslem hpung shang kahpu gaw, shi hpe masha wunawng wuna a man kaw dun hkawm nhtawm, “Ngai Roderick gaw, Hkristan makam masham hpe tawn kau da nna Moslem tai mat sana re” nga nna marawn tsun jahtau shangun wu ai. Jau Roderick chyawm gaw, nau zingri nna machyi mat ai majaw, kahpu Moslem wa tsun ai ga n jaw ai nga nna ga hkaw mi sha pyi n lu tsun mat sai.

Roderick kade nna yang bai hkawm lu nna lawt mat wa nu ai. Shaloi kahpu gaw, matut manoi, “Roderick gaw, Moslem tai ai hpang Hkristan de bai gale mat sai” nga nna kanau hpe mara bai tam wu ai. Jau Roderick chyawm gaw, “Ngai galoi mung nye a Hkristan makam masham hpe n nyet kau yu ai; ngai gaw, galoi mung Hkristan hpung masha she re.” nga nna bai tsun dat wu ai. Shaloi tara agyi wa gaw, Jau Roderick tsun ai ga hpe n kam ai majaw, Cordoba mare kaw na maza mala law dik ai n hkun kata de Jau Roderick hpe kabai bang kau wu ai. Jau Roderick gaw, sat kau hkrum ai aten du hkra shi a makam masham hta ngang ngang kang kang rai hkan shatup lai wa sai. Nhkun kata kaw kade na hkra bang da nna, zingri shatsang tim, Jau a makam masham myit hpe n jahten ya lu ma ai. Dai majaw, hpang jahtum e San Pra ai Jau Roderick hpe baw kahtam sat kau ma ai.

Jau Roderick, n nga mat ai hpang, Nawku Hpung gaw, shi hpe e, San Pra ai Masha dang dat let, Shi a Poi Nhtoi hpe mung, March shata (13) ya shani masat shagrau dat ya sai rai nga ai.

Daini Nawku Hpung gaw, San Pra ai Jau Roderick a Poi Nhtoi hpe galaw nga ga ai hte maren, anhte a prat hta mung, kaning re ai zingri zingrat lam ni hkrum kadup wa ai raitim, tinang lu da sai makam masham hpe jahtum ten du hkra gwi gwi sak se hkam lu ai ni byin tai lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)