San Pra ai Jau Philip Rinaldi a Poi Nhtoi (December 5)

San Pra ai Jau Philip Rinaldi gaw, Italy Mungdan, Lu Monferrato mying ai shara hta, lai wa sai 1856 ning, May shata (28) ya shani shangai chyinghkai wa ai rai nga ai. Shi gaw, kaji ai aten kaw nna, San Pra ai Don Bosco hpe chye ai raitimung, asak (21) ning du ai shaloi she shi hpe Don Bosco shaga la wu ai.

Philip Rinaldi gaw, 1882 ning hta, Jau tai wa ai hpang asak kaba sai Jau tai jawngma ni hpe yu gawn lai wa sai. 1889 ning kaw nna, (12) ning tup Portugal Mungdan hte Spain Mungdan ni hta magam gun lai wa sai. 1901 ning hta, Don Bosco gaw shi hpe Jau Kaba, Vicar General lit hkam hte sut masa lit hkam aya dang da ya hkrum sai. Salesian wuhpung hpe yu gawn ai lit kaw nna shi a wenyi lam woi masing gaw grai tang du ai hpe mu lu ai. Dai majaw, dai aten hta Salesian Wuhpung gaw, grai rawt jat galu kaba wa sai.

1922 ning hta, shi gaw Rector Major (Shing N rai) Ningbaw Kaba byin tai wa sai. Shi gaw, shi hte magam rum Jau ni a Wenyi Rawt Jat ai lam hte Don Bosco hpe kam shamyet sadi dung ai lam hpe asak mi rai sharin ya ai. Shi madung tawn sharin ya ai lam ni gaw, wenyi rawt jat lam, aten shagu Karai Kasang hte arau nga ra ai lam, Hkristian Sasana magam shachyen sa wa ai shaloi, Hkristian ni a Nrum Ntau Nu Maria hpe kam shamyet ai myit kaba hte shachyen sa wa ai lam ni, sharin dawk bang ya ai. Htawm hpang de byin wa na lam ni hte seng nna “Aten ladaw a kumla” hpe tau chye lu ai shaman chyeju atsam mung lu ai wa rai nga ai. Tsun shadum ra ai lam ni hpe hkrit myit n rawng ai sha aja awa shadum ya ai.

Jau Philip Radaldi gaw, 1931 ning, December shata (5) ya shani, Italy Mungdan, Turin mare kaw, Madu hta yup pyaw ban sa mat wa sai rai nga ai.

Shi n nga mat ai hpang, 1990 ning, April shata (29) ya shani, dai aten na, Wa Sarabyin Yawhan Pawlu (II) kawn, San Pra ai masha ngu dang dat let, shi a Poi hpe mung, December shata (5) ya shani ngu masat dat ya sai rai nga ai.

Daini San Pra ai Jau Philip Rinaldi a Poi nhtoi hpe Nawku hpung kawn galaw ya nga ai aten, anhte hpung masha ni a myit hta mung, Nawku Hpung a ang ai Magam lam ni hta n hkrit n tsang rai gun hpai hkawmsa lu na matu, lak san akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)