San Pra ai Jau John Eudes (August 19) 19 August 2023

San Pra ai Jau John Eudes (August 19)

San Pra ai Eudes gaw, 1601 ning, November shata (14) ya shani hta, Fransik mungdan hta shangai chyinghkai wa ai rai nga ai. Shi hpe “Yesu a Chyoi Pra Salum Kasa” ngu masat shamying nga ai. Kanu Kawa ni myit n hkrum ai sha shi gaw, Paris mare na Congregation of the Oratory mying ai sasana magam gun wuhpung de shang mat wa ai. Shi hta atsam rawng ai hpe mu lu ma nna, Jau tai jawngma sha naw rai nga timung, Saradaw hte Jau ni gaw shi hpe tara hkaw na ahkaw ahkang jaw ma ai. Jau tai ai hpang shi gaw, dai aten na mying kaba htum sasana magam gun wuhpung kaw malawm langai mi tai wa ai.

Jau John Eudes galoi mung atsun nga ai ga gaw; “Tara hkaw ai wa gaw sumwum ni hpe gayet ai; mara raw ai wa gaw u numji hpe rim ai.” (The preacher beats the bushes, but the confessor catches the birds) nga ai ga rai nga ai. Shi hpung gawan hkawm ai shaloi, yu maya hpung masha ni hta Jau ni hpe grau gram sharai ra ai mahkrum madup hpe mu lu ai. Bai Jau John Eudes galoi mung tsun ai lam gaw, Missa hkungga hpe gying dan hte shang lawm lu na matu ra kadawn ai lam masum nga ai. Dai ni gaw, (1) Tau hkrau lajang ai; (2) Nawng jau ai; (3) Chyeju htang ai lam ni rai nga ai, nga nna ayan tsun lai wa yu ai.

1643 ning hta Oratorian wuhpung a hpang “Yesu, Maria” mying ai Wuhpung hpe bai gaw de da ya sai. Ndai Wuhpung shang ai ni gaw, Jau tai jawngma ni hte ginwang up Jau ni hpe madung tawn nna shaman shakyang shalat ya na matu rai nga ai.

Wa Jau John gaw, Yesu hte Maria a Salum Ningsang hpe grai hkungga shagrau ai myit jasat rawng ai. 1670 ning hta, “Hkungga la ra ging ai Yesu a Salum hpe hkungga jaw ai” (The Devotion to the Adorable Heart of Jesus) ngu ai Laika buk hpe ka shapraw dat sai. Dai lam hte seng nna, Missa Hkungga hte Akyu hpyi ai (Mass and Office) masing mung lawm nga ai. Jau John tau nau ra sharawng ai lam hpe mali ning na ai shaloi, Madu Yesu a Chyoi Pra ai Salum gaw, San Pra ai Margaret Mary Alacoque kaw dan praw nna madi shadaw ya sai.

Wa Jau John gaw, 1680 ning, August shata (19) ya shani hta Madu kaw yup pyaw ban sa mat wa sai rai nga ai.

Wa Jau John n nga mat ai hpang, 1909 ning, April shata (25) ya shani, dai aten na, Wa Sarabyin Pius (10) kawn, Shi hpe A lu ai Masha masat dat ya sai rai nga ai.

Dai hpang, 1925 ning, May shata (31) ya shani hta gaw, dai aten na, Wa Sarabyin Pius (11) kawn, Shi hpe San Pra ai Masha  dang dat let, Shi a Poi Nhtoi hpe mung, Shi nsa hti mat wa ai, August shata (19) ya shani masat shagrau dat ya sai rai nga ai.

Daini Nawku Hpung gaw, San Pra ai Wa Jau John Eudes a Poi Nhtoi hpe galaw nga ga ai aten hta, anhte mung, tinang lu da ai atsam hte tinang a nawku hpung a matu sha nrai, tinang a kun dinghku a matu, myu hte mungdan a matu akyu rawng ai hku nna shang lawm lu ai ni byin tai lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)