San Pra ai Januarius a Poi Nhtoi (September 19) 19 September 2022

San Pra ai Januarius a Poi Nhtoi (September 19)

San Pra ai Januarius gaw, “Naples mare hpe makawp maga ai San Pra ai Masha” rai nga ai. Shi gaw, tsa ban masum htum wa maga de shangai chyinghkai wa ai wa rai nga ai. Nawku Hpung hpe Diocletian ni zingri shamyit nga ai aten hta Shi gaw, Benevento mare na Saradaw rai nga ai. Shi a Deacon lahkawng hte Hpung Masha lahkawng gaw, makam masham a majaw rim hkrum mat ai shiga na lu ai shaloi, Saradaw gaw, shanhte hpe makam masham hta manoi manat nga na matu, n gun sa jaw na lajang wu ai. Dai lam hpe n hkru n kaja ai ni na mat nna, Saradaw hpe mung rim la nhtawm, matse labye ni hpe kabai jaw kau ma ai. Matse labye dusat ni gaw, Saradaw hte shi a masha ni kadai hpe mung tsep kawp n hkra ma ai; dai zawn rai nna, matse labye ni hpa n di ai lamik kumla hpe lak-hpoi a majaw re, nga nna mara nhtang shagun ai hpang, Saradaw hte Shi a Masha ni hpe Pozzuoli mying ai shara de woi sa mat wa nhtawm, baw kahtam di sat kau lai wa ma ai.

San Pra ai Saradaw Januarius hte seng nna, mying kaba ai lamik kumla ni law law kaw na, shi a sai ge tawng byawng wa ai lamik kumla gaw mying kaba dik htum rai nga ai. Daini na aten hta, Naples mare na, Cathedral Nawku Htingnu Kaba kaw tawn da ai San Pra ai Saradaw Januarius a “Achyang re ai sai tawng” Dark and solid blood, hpe shawa masha ni a matu, laning mi hta masum lang shaw madun tawn ya nga ai re. Dai sai bang tawn ai tau hpe lit ang ai Jau gaw, nhtang hku gale galau di dat jang, sai tawng gaw, sai hkyeng tai nna lwi pru wa ai. Lamik kumla jep sagawn ai ni yawng hta na, ndai sai jep sagawn ai lam gaw, law dik ram rai nga ai lam, labau hta mu hti lu nga ai. Shing gyim myit jasat sha rawng ai hpung tang hpaji ning hkring ni pyi, ndai sai ge tawng kaw nna sai lwi pru wa ai hpe madi shadaw, sak se hkam ya ma ai. “Kam ai ni a matu, lamik kumla gaw n ahkyak ai; n kam ai ni a matu lamik kumla sha gaw n law ai” nga ai ga matsun nga nga ai.

Saradaw Januarius n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, September shata (19) ya shani ngu masat shagrau dat ya sai rai nga ai.

Daini Nawku hpung gaw, San Pra ai Saradaw Januarius a Poi Nhtoi hpe galaw nga ga ai aten, anhte hpung masha ni mung, Saradaw Januarius zawn, Makam Masham a majaw, ru yak jam jau hkrum sha nga ai, tinang a hpung masha manaw manang ni n gun jaw, chye lakawn la ai ni byin tai lu hkra shakut nga ga law.

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

         

 

Add new comment

1 + 9 =