San Pra ai Issac Jogues hte Manang ni a Poi Nhtoi (October 19)

St. Isaac Jogues and Companions (October 19)

San Pra ai Issac Jogues hte Manang ni gaw, Fransik amyu sha Jesuit Sasana Magam gun wuhpung ni rai ma ai. Shanhte gaw, America hte Canada mungdan kaw nga shajng ai Huron hte Iroquois red Indian amyu sha ni hpe, Madu a Kabu Gara Shiga hpe sa hkaw shachyam shabra ya sai, Sasana magam gun share shagan ni rai nga ma ai. San Pra ai Issac a manang ni gaw, John de Brebeuf, Charles Garmier, Anthony Daniel, Gabriel Lallemant, Noel Chanbanel, John de Lalande hte Rene Goupil ni rai ma ai. Shanhte si hkam ai nhtoi ni gaw kaga ga rai nga ma ai raitimung, shanhte yawng gaw, Iroquois Idian amyu sha ni e makam masham a majaw htau sat kau hkrum ai ni hkrai rai nga ma ai.

San Pra ai Issac Jogues gaw, America mungdan na Manhattan zinlawng de shawng du ai Kahtawlik Jau rai nga ai. Shi gaw, 1646 ning hta New York ginwang, Auriesville mayan na, Iroquois amyu sha ni hte jinghku sa shachyen la wu ai. Dai shaw kaw nna, shi gaw manang ni hte rau dai amyu sha ni nga ai America dan hte Canada mungdan na shara law law ni de Madu a Kabu Gara Shiga sa du shachyawm shabra na matu sa du ma ai. Shanhte gaw, dingdung America hta shanu nga ai buga masha ni a laja lana rai ninghkap nna dingbai dingna jaw ai hpe hkrum sha lai wa ma ai. Raitimung, shanhte gaw n hkrit ma ai; Karai Kasang hte Nawku Hpung a matu shanhte a asak hte galai nna sasana magam gun na matu myit daw dan taw ma ai.

Dai majaw, shanhte gaw, aten mung kaga ga rai rim hkrum ai, htawng mung kaga ga sharawng da nna, adup zingri hkrum let, hpang jahtum gaw, du kahtam daw sat kau hkrum lai wa masai. Shanhte hpe, 1925 ning, June shata (21) ya shani, dai aten na Wa Sarabyin Pius (XI) gaw, A-lu ai masha ni ngu masat shagrau dat sai rai nga ai.

Dai hpang 1930 ning hta June shata (29) ya shani, Wa Sarabyin Pius (XI) hkum nan, San Pra ai masha ni ngu dang dat let, shanhte a Poi Nhtoi hpe October shata (19) ya shani masat shagrau dat ya sai rai nga ai.

Daini Nawku hpung gaw, San Pra ai Issac hte shi manang ni a Poi Nhtoi hpe galaw nga ga ai hte maren, anhte hkam la da lu sai Madu a Kabu Shiga ni hpe, anhte a makau grup yin na makam masham hpe n lu la shi ai ni a matu, sakse tai ya lu ai, Hkristian hpung masha ni tai nga lu u ga matu, akyu hpyi la nga ga law.

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

 

29 June 1930, Vatican City by Pope Pius XI

Add new comment

2 + 1 =