San Pra ai Hyacinth a Poi Nhtoi (August 17) 17 August 2023

San Pra ai Hyacinth a Poi Nhtoi (August 17)

San Pra ai Hyacinth gaw, Poland mungdan, Silesia mare kaw dai daw wa ai rai nga ai. Shi gaw, Tara Hpaji jan mau “Doctorate in Laws” hte Karai Hpaji Ning hkring “Doctorate in Divinity” jan mau ni hpe Cracow, Prague hte Balogna Dakkasu ni kaw na lu la lai wa ai. Cracow mare na, Saradaw Vincent gaw, shi a Saradaw Ginwang yu gawn na matu shi hpe shaga la ai. Saradaw Vincent n nga mat ai hpang, Hyacinth a kawa di Yvo gaw, Saradaw bai tai wa sai.

Hyacinth gaw 1218 ning hta shi a lawu lahta kanau jan Ceslas hte rai, Saradaw Yvo a hpang hkan tai nna Roma mare de sa ma ai. Roma mare kaw nga taw ai San Pra ai Dominic hpe grai yu n gun lu ai majaw, Hyacinth gaw, St. Savina jawng kaw shang nga mat ai. Shi gaw, Dominican Jau wuhpung ga sadi tawn ngut ai hpang Poland mungdan de bai du wa nna, shanhte a sasana magam gun wuhpung a ningbaw lit shatsam ya hkrum sai.

Poland mugdan de bai nhtang wa ai lam ding yang, Kabu Gara Shiga hkaw sharin wa ai majaw, masha law law shanhte a wuhpung de shang wa ma ai. Jau Hyacinth gaw, dingdung maga na grai tsan ai Prussia, Pomerania, Baltic, Denmark, Sweden, Norway mungdan hkan du hkra tara mungga shabra ya lai wa sai. Russia mungdan hte “Panglai Chyang” Black Sea mayan na Tartars amyu sha ni kaw du hkra sa du lai wa ai. Jau Hyacinth gaw, Miwa hte Tibet mungdan de mung du kau da ai.

1257 ning hta Cracow de bai nhtang wa nna, August shata (15) ya shani, shi a asak (72) ning hta, Madu kaw yup pyaw ban sa mat wa sai rai nga ai. Jau Hyacith hpe dai aten na, “Hkrun lam hkawm dik” ai masha ngu shamying ya ma ai. Bai nna, San Pra ai Wa Jau Hyacinth hpe “Dingdung Daw a Kasa “Apostle of the North”, ngu nna mung shakawn shagrau ma ai.

Wa Jau Hyacinth hpe 1594 ning, April Shata (17) ya shani hta, dai aten na Wa Sarabyin Clement (VIII) kaw nna, Shi hpe San Pra ai masha dang dat ya let, shi a Poi Nhtoi hpe mung, August shata (17) ya shani masat shagrau dat ya sai rai nga ai.

Anhte hpung masha ni mung, Wa Jau Hyacinth a labau kadun hpe hti hkaja la lu sai hte maren, anhte du ai shara, ginra ni hta Madu a Kabu Gara Shiga ni hpe hkawn tsun sak se hkam lu ai ni byin tai lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)