San Pra ai Hunna a Poi Nhtoi (April 15)

San Pra ai Hunna gaw, tsa ban (7) hta ngai lai wa ai; shi gaw, ahkang aya kaba lu ai ginwang up du a kasha mung rai nga ai. Shi gaw, Huno mying ai Fransik mungdan Strasbourg mare na salang kaba jan tai wa sai. Ahkang aya kaba lu nna, nga pyaw ai htinggaw kaw na raitimung, shi gaw ntai nmai rei ai ni, matsan jam jau hkrum ai ni hpe shagrit shanem ai myit, hpunau tsawra myit, san seng ai myit masin hte yu gawn ai amu hpe grai sharawng shara rai nna gun hpai lai wa sai. Matsan mayan re ai htingbu ni a bu hpun palawng ni hpe hkrut shatsai ya ai amu galaw ai, dai majaw, shi hpe arai Hkrut ai San Pra ai Num ngu nna shamying tsun shaga ma ai.
Fransik mungdan, Nevrs mare na San Pra ai Saradaw Deodatus gaw, San Pra ai Hunna a makam masham a npawt hkri dun rai nga ai. Hunna yan a kasha hpe Saradaw hkum nan kashin kamun jaw mying shamying ya sai. Dai Ma gaw, kaba wa ai shaloi San Pra ai Saradaw Deodatus hpaw hpang da ai Jau jawng de shang mat wa sai.
San Pra ai Hunna gaw, A.D (679) ning hta Madu kaw yup pyaw ban sa mat wa sai rai nga ai.
Shi n nga mat ai hpang, 1520 ning hta, dai aten na, Wa Sarabyin Leo (X) gaw, shi hpe San Pra ai masha dang dat let, shi a Poi Nhtoi hpe mung, April shata (15) ya shani ngu masat shagrau dat sai rai nga ai.
San Pra ai Hunna gaw, lam shagu ra n rawng hkra hkum hkum tsup tsup lu nna nga pyaw ai masha ni, ndai ginding ga na sutgan hpe mung, n lu ai ni hpe galaw daw lu yang she, myit pyaw myit di kai myit jasat hte seng nna kasi kamang majing tai wa sai rai nga ai.

By;
Sister Rose Angeline Maran Nang Doi (SFX)
RVA-Kachin Service (Myitkyina)