San Pra ai Hpaji Ninghkring (Doctor) Basil hte Gregory Nanzianzen Yan a Poi Nhtoi (January 2)

San Pra ai Hpaji Ninghkring Basil gaw, Turkey mungdan, Caesarea mare kaw, lai wa sai A.D 329 ning hta shangai chyinghkai wa sai rai nga ai. Shi gaw, Sinpraw dan kaw na, Sasana magam gun Tawra Jau (Monk) Wuhpung, “Easter Monks” na Saradaw lit shatsam ya ai hpe hkrum sai. Ethens mare kaw, shi hpaji sharin la nga ai aten hta San Pra ai Nanzianzen hte chye hkau wa wu ai.

Shan lahkawng gaw, Hkristian byin tai wa lu ai shaman chyeju hpe arawng la ai lam hta kasi kamang tai wa masai. San Pra ai Basil gaw, shaning law law Tawra Jau ni hpe laika sharin ya ai hpang, zaibru jang de tara shadik na matu, rawt sa wa wu ai; shi a hpang hkang ai ni grai law ma ai.

A.D 370 ning hta, shi hpe Caesarea mare kaw na, Saradaw lit shatsam ya ai hkrum nu ai. Saradaw Basil gaw, Arian a shut dik ai sharin shaga lam hte dai ten na Hpung woi Jau ni a n kaja ai kasi ni hte seng ai nna nden ja ja rai ninghkap kau let sharin shapan shading sharai ya nna, Nawku Hpung a sari hpe hkyen la nu ai. Hku wa kaba hku wa ai aten hta, San Pra ai Basil gaw, shat shadu hking hte kawsi hkrum nga ai ni hpe galaw dau jau lai wa ai.

Shi ka da ai laika ni hte shi hkaw shabra ai mungga ni a majaw, mying grai kaba wa su ai. Dai majaw, shi hpe Basil the Great “Magrau grang ai Basil” ngu nna shagrau ya ai rai nga ai. Lusu ai masha hpe “Na a lata na htoi kabrim ai lachyawp dai hte hka nlu wa nna hkyuk de du mat wa ai masha kade mi hpe she hkyen la lu na wa le i? Na a hkik hkam la ai buhpum dai hte masha kade mi hpe she lu jahpun ya na wa le i? ” ngu nna shadum ya ya rai wu ai. Shi asak naw hkrung nga ai aten tup hta, n sim n sa masha kaga ni law law a matu, amu glaw ya lai wa nu ai. San Pra ai Basil gaw, A.D 379 ning, January shata praw (2) ya shani, shi a sak (50) ning  hta Madu kaw yup pyaw ban sa mat wa sai rai nga ai.

San Pra ai Nanzianzen gaw, A.D 329 ning hta, Turkey Mungdan, Nazianus mare kaw shangai chyinghkai wa ai rai nga ai. Shi a Kawa gaw, Naziarus mare na, Hpung woi masha kaba lit magam hpe (45) ning tup gun hpai lai wa sai mung rai nga ai. San Pra ai Nazianzen gaw, Ethens mare kaw shi hte arau laika hpaji sharin lai wa sai, San Pra ai Basil hte maren, laika sharin ai lam hta grai byin, grai ningtawn ai wa tai wa sai. Raitimung, shi a manang San Pra ai Basil hte maren tara grau shatup lu na matu, Tawra Jau Wuhpung (Monk) de shang mat wa nu ai.

A.D 375 ning hta, shi hpe Constinople mare na, Saradaw lit shatsam ya ma ai. Dai mare mung, Aria a shut shai di kai sharin shaga lam a majaw, shaning (40) ning jan dingbai dingna jaw hkrum ai mare rai nga ai. Dai majaw, dai mare kaw shi Saradaw lit shatsam hkrum nna mare de shang wa ai shaloi, baw mung krin tawn ai majaw kun, a kaw a law nga nna n hkap tau la ma ai.

Raitimung, hpang de, Karai Kasang Langai, Marai masum a lam shi hkaw sang lang dan ai majaw, mying grai kaba dan dawng pru wa ai. “Theologian” (Karai Hpaji hte seng ai Hpaji Ninghkring) nga nna shagrau masat ya hkrum sai rai nga ai.

San Pra ai Nanzianzen gaw, A.D 390 ning, shi a sak (61) ning hta Madu kaw yup pyaw ban sa mat wa sai rai nga ai. Shi a Moimang hpe Roma mare na, San Petru Nawku Htingnu kata hta makoi mayang da sai rai nga ai.

Daini Nawku Hpung gaw, San Pra ai Basil hte Gregory Nanzianzen yan a Poi Nhtoi hpe galaw nga ga ai ten, anhte marai hkum shagu a myit masin hta mung, Karai Kasang Wa a Makam Masham lam ni hpe teng man ai hku nna hkap la hkan sa lu na chyeju jaw ya rit ga mgu, akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)