San Pra Ai Hilary A Labau Lam ( 14 Jan, 2020 )

San Pra Ai Hilary A Labau Lam

          Nu wa hpu nau ni, San Pra ai Hilary gaw, Madu a shaning (315) ning hta, Francis Mung Poitiers mare kaw shangai dai daw wa sai lam chye lu ai. Lusu sahti kasha mung rai nga ai. Shingrai, shi gaw, tsa ban (4) laman na makam masham hte seng nna, magrau grang ai, Leading Theologian ngu ai, ningbaw ningla woi awn hpaji ladat hpe grai ningtawn chye tawn da ai wa, langai mi mung rai nga ai. Lusu sahti kasha rai tim, shi a Ma prat ten hta, makam masham n nga ai wuhpung kata kaw nga kaba wa ai lam chye lu ai. Hilary gaw, sak prat ram wa sai hte rau kun dinghku de  nna, Apra ngu shamying ai kasha shayi sha langai mi lu ai hpang shi gaw hpara shalaw nna, sak hkrung nga sa lam hpe n hkap la mayu ai majaw, shi a myit hta nga yawng nga pra a ntsa kaw langai mi sha mai nga na re, nga nna, myit lu nu ai. Shinggyim masha yawng hpe uphkang ai hte, tsawra matsan dum chye ai gaw, htani htana grin ai, hpan Madu Karai ngu ai, langai sha nga na re ngu, myit sumru nga sai. Ya na zawn myit ung ang taw nga ai ten, Ja Chyum Laika kaw nna, mahtai lu la nu ai. Dai hpang shi gaw Chyoi Pra ai Kahtawlik Nawku Hpung de gale shang wa nhtawm me, Kashin Kamun Sakramentu hpe hkam la sai lam labau shang rai nga sai.

          San Pra ai Hilary gaw, shi kalang mi hkam la da sai makam masham hpe myit maju jung let kam sham hkan sa nga nu ai. Gadai hpa mi tsun tsun, shi a myit hta hkam la da sai makam masham hpe manoi manat nga sai rai nga ai. Shingrai, shi a makam masham myit ja ai hpe shawa hpung masha ni mu lu nna, mau mat masai. Dai majaw, yu maya hpung masha langai mi sha naw re ai Hilary hpe Poitiers mare kaw na Saradaw lit hpe hkap la na matu, shadut masai. Raitimung, Hilary gaw, shagrit shamen myit hte kaning re ai ahkang aya hpe mung nhkap la ai sha, yu maya hpung masha langai mi hku nna sha sakhkrung shakut nga sa wa na lam mahtai jaw dat nu ai. Dai zawn shi a shagrit shanem ai myit hpe mu chye magang, shawa hpung masha ni gaw, shi hpe lit shatsam mayu ai myit law jat wa magang shabyin ya sai rai nga ai. Dai majaw Madu a shaning (353) ning hta Saradaw  aya hpe n ningdang lu nna, hkap la ra mat sai rai nga ai. Nu wa ni, dai aten hta, Karai Kasang hpe ninghkap nna, nteng nman ai lam hta hkawm sa ai ni law law rai nga ai. Shingrai, Arian a shut shai sharin lam kaba rai nga ai, “Yesu gaw Karai Kasang n re” nga ai sharin shaga ai lam hpe Saradaw Hilary ninghkap ya ai hte shading sharai ya nu ai.

 

 

          Nuwa ni, San Pra ai Hilary gaw, masha ni hpe makam masham hkaw tsun gat hkai ai shaloi, “Madu Yesu gaw, Karai Kasang majing tai nga ai, nga nna, masha ni chye na hkra sharin shaga let, ninghkap kau lu sai lam” labau hta asan sha mu lu nga mali ai. Ndai zawn Arian a sharin shaga ai hpe ninghkap ya ai majaw, Hilary hpe Hkawhkam Constantius  gaw, Francis Mung kaw nna, gawt shapraw kau hkrum sai rai nga ai. Ndai zawn gawt shapraw hkrum ai laman hta, Hilary gaw, myitdaw myit kaji ai lam n nga ai sha, “ Karai Kasang langai, Numrai Masum” nga ai lam laika ka nhtawm me, aten hpe manu jashawn nga nu ai. Shingrai, Madu a shaning (361) ning hta, Saradaw Hilary gaw, Poitiers mare de bai du wa lu sai lam chye lu ai. Dai mare de bai du wa lu sai nhtoi kaw nna, Saradaw Hilary gaw, Kahtawlik makam masham lam hpe nhkrit ntsang ai sha, nsen ja ja rai, hpang jahtum ten du hkra, shakut magam gun hpai lai wa sai lam daini du hkra Nawku hpung a labau hta matsing da ai hpe mu lu nga mali ai nu wa ni. San Pra ai Saradaw Hilary gaw,  Madu a shaning ( 367) ning hta, yup pyaw ban sa mat wa sai rai nga ai. Saradaw gaw, shi a hpang jahtum na aten du hkra, Nawku Hpung a awng dang ai lam woi ningshawng tai let, sakhkrung nga lai wa sai re.

          Nu wa ni, San Pra ai Saradaw Hilary gaw, shagrit shanem myit kaba ai hte shawa masha ni kaw na, tsawra myit kaba hkap la lu ai wa rai nga timung, makam masham hte seng wa ai shaloi, shut shai ai sharin shaga lam, woi awn ai ni hpe gaw nhkrit ntsang ai sha ninghkap shading sharai ya lu ai ningbaw kaba langai mi mung rai nga mali ai re. Shingrai, Saradaw a jaw teng ai lam hta gwi gwi, ninghkap let shakut shaja ai lam hpe yawng gaw arawng la, shakawn shagrau nga ma ai. Mare buga, htingbu htingbyen hte Nawku hpung a matu, kanu kawa, hpu shawng hpu ba tai ya ai sha n ga, makam masham lam hta mung, Wenyi kawa tai let, shakut mat wa sai lam gaw mau hpa chyeju atsam ni nan rai nga mali ai re. Shingrai, tsawra ai nu wa hpu nau ni, anhte yawng mung San Pra ai Saradaw Hilary a kasi hpe la let, jaw teng ai magam lam shagu hta gwi ai myit masin hte shakut sa wa lu hkra, n gun dat ga. Teng man ai lam hta Madu Karai Kasang gaw, teng sha tsap ya na re. Kaja ai myit masin arawn alai nga ai ni a myit kraw kata hta mung, Madu Yesu shingbyi nga na gaw teng sha re. Nuwa ni, ya daini na ten, njaw nteng ai lam hta tsap nga ai ni law law rai nga ai. Daizawn re ai mabyin a majaw, lam shagu hta hkrat sum ai lam mung law law rai nga ai hpe anhte a makau grup yin hkan mu lu na re. Shingrai, njaw nteng ai, nhkru nkaja ai lam yawng hpe tawn kau nhtawm me, Karai Kasang a teng man ai hta sak hkrung hkawm sa lu hkra shakut sa wa ga, Chyoi Pra ai Kahtawlik Nawku hpung kawn nna, San Pra ai Hilary a poi nhtoi hpe January Shata (13) ya shani ngu masat da ya sai hte maren, ndai nhtoi shani hta lak lai ai chyeju ni hpyi la nga ga ngu, n gun jaw let lamang hpe ndai kaw naw jahkring sai rai.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.

 

 

 

Add new comment

2 + 17 =