San Pra ai Hilarion a Poi Nhtoi (October 21) 21 October 2022

San Pra ai Hilarion a Poi Nhtoi (October 21)

San Pra ai Hailarion gaw, Palestine Mungdan, Gaza shara kaw lai wa sai, A.D (291) hta shangai chyinghkai wa ai rai nga ai. Shi a Kanu yan Kawa gaw, hpung masha nre ai, tara maigan masha rai nga ma ai. Hailarion chyawm gaw, Alexandria mare kaw hpaji sharin ai kaw nna, Hkristian Makam hpe hkap la lu nu ai. Shi gaw, San Pra ai Anthony hte rau Egypt Mungdan, Zaibru jang kaw akyu hpyi shaja, tsin yam hkam sharang nna sa nga wu ai.

Dai shara kaw nna, bai wa nhtawm Gaza mare kaw shi hkrai sha akyu hpyi shaja nna wa nga ai. Hailarion, Shi a asak (20) ning sha naw raitimung, masha law law hpe makam masham nli gat hkai nna, makam masham de jashawn la wu ai. Shi a Wenyi hte seng ai lam, machye machyang hte seng ai lam ni hta ning tawn ai lam hpe mu nna, masha law law shi hpang de sa du hpaji hpyi lai wa ma ai. Shi a hpang hkang ai ni law wa na matu, Majuma ngu ai shara kaw, A.D (329) ning hta, jawng langai mi gaw gap da wu ai. Majuma gaw, Palestine Mungdan a mare daju Gara a sang hpaw daru mung rai nga ai.

Nawku Hpung hpe Hkawhkam Julia gaw, laja lana zingri zingrat wa ai majaw, Jau Hilarion gaw Libya Mungdan hte Sicily mungdan dan ni de sa yen nga mat ai. Shi a hpang hkan langai mi rai nga ai, San Pra ai Hesychius gaw, shi hpe masum ning tup hkan tam ai hpang bai mu lu sai.

San Pra ai Hilarion tara shatup nna sa nga kau da ai shara gaw, hpang de hpung masha ni a matu makam masham hte seng nna grai manu ai shara byin tai wa sai. San Pra ai Hilarion a san seng san pra ai myit jasat gaw, masha law law hpe hpri sharaw zawn rai nna Karai Kasang hpang de gang dun garawt bang la lu nu ai.

Jau Hilarion gaw, Ndai zawn rai Karai Kasang Wa a magam gun nga ai aten, A.D (371) ning hta Madu kaw yup pyaw bansa mat wa sai rai nga ai. Shi a moi mang hpe San Pra ai Hesychius gaw, Gaza mare kaw na Majuma sang hpaw daru shara kaw, gap tawn ai Nawku Jawng kaw lup makoi mayang da sai rai nga ai.

San Pra ai Jau Hilarion a lam hpe hti sumru yu dat shaloi, shingtai langai sha azim sha nga ai lam gaw, garen gari lam n rai, Karai Kasang Wa hte ga shaga na, akyu hpyi na matu aten grau lu la nga ai lam hpe kasi madun lai wa sai rai nga ai.

Jau Hilarion n nga mat ai hpang, Nawku Hpung gaw, shi hpe San Pra ai Masha dang dat let, Shi a Poi Nhtoi hpe mung, October shata (21) ya shani masat shagrau dat sai rai nga ai.

Daini Nawku Hpung kawn, San Pra ai Jau Hilarion a Poi Nhtoi hpe galaw nga ga ai aten hta, anhte mung daini na prat masa hta mung, dinghta ga na prat de jak rung jak rai, mawdaw, cycle ni garu kaji nga ai raitim, tinang hkrai a katsi sha zim rai nga nna, Karai Kasang Wa hte rau Ga shaga na aten hpe lu la hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)