San Pra ai Henry (July 13)

Germany mungdan a hkawhkam kaba Henry gaw, A.D 973 ning hta shangai wa ai rai nga ai. Ratisbon mare na, San Para ai Saradaw Wolfgang gaw, shi hpe Hkristian makam masham npawt nhpang lam ni hpe sharin ya lai wa sai. Asak (23) ning hta, Kawa a hkang galai nna, Bavaria ginwang uphkang du kaba lit shatsam hkrum lai wa nhtawm, asak (30) ning hta shi a lawu lahta hkawhkam Otho (III) gaw, n nga mat ai. Dai shaloi, dai nnga mat sai Hkawhkam a hkang galai na matu Emperor madang ahkang aya hpe Wa Sarabyin Benedict (VIII) kawn Henry hpe shatsam dat sai.  

Hkawhkam Henry gaw, makam masham myit grai rawng ai; Nawku Hpung kata na gram sharai ya ai lam, sasana made je ai lam ni hta matsan ai ni hpe alak mi yu gawn ai magam bungli law law hpe galaw lai wa sai. Tawra Jau byin mayu ai majaw, shi lu ai Hkawhkam ahkaw ahkang hte shi hpe hkap la na matu Verdun mare na, Tawra Jau kaba kaw hpyi shawn wu ai. Shi a makam masham kaba ai shaman chyeju hpe mu nna, shi hpe Tawra Jau tai na ahkang jaw ya sai. Mungdan uphkang na lit mung matut gun shangun wu ai. Tawra hte hkawhkam rai nga ai, Henry gaw, Mungkan ga ntsa gun ai lit gaw shawa wuhpung kaja lam a matu, Karai Kasang hkum nan lajang ya ai lit re ngu nna hkap la ai; shi a lit hpe shagrit shanem ai myit hte shawang tsawra myit kaba hte galaw gunhpai lai wa ai.

Henry hkawhkam kaba gaw, sasana magam gun ni a ginjaw law law hpe de ya ai; wanglu wanglang makam masham hpe hkan shatup na ahkang jaw ya ai hte Bumverg mare na Saradaw a Nawku htingnu hpe mung gaw gap ya lai wa sai.

Shi gaw, kashu kasha nlu ai; 1204 ning hta nnga mat sai rai nga ai. Hkawhkam kaba Henry gaw, German amyu sha ni a Saxon htinggaw kaw nah pang jahtum ngu na hkawhkam mung rai nga ai.

Shi hpe 1146 ning hta Sanpra ai masha hku nna dang dat let, shi a Poi nhtoi hpe shaning shagu, July shata (13) ya shani hta, nawku hpung masat galaw ya ai rai nga ai.

By;

Sister Rose Angeline Maran Nang Doi (SFX)

RVA-Kachin Service (Myitkyina)