San Pra ai Hannibal Mary di Francia a Poi Nhtoi (June 1) 01 June 2023

San Pra ai Hannibal Mary di Francia a Poi Nhtoi (June 1)

San Pra ai Hannibal Mary di Francia gaw, Italy Mungdan, Messina Mare kaw 1851 ning, July shata (5) ya shani shangai chyinghkai wa ai rai nga ai.

Shi Jau tai wa ai hpang, matsan masha ni a matu, lak san n gun dat galaw ya sai. Shi gaw, matsan ai ramma ni hpe grai tsawra let yu gawn ya ai myit rawng ai. Shi hpe “Karai Kasang a Magam Gun ni a matu, Akyu hpyi shaja ai Kasa” (Apostle of Prayer for Vocations) nga nna shagrau shamying ai rai nga ai.

San Pra ai Hannibal Mary di Francia gaw, Karai Kasang a magam gun ni law htam wa na matu hkaw shabra na “Rogationists th++e Daughters of Divine Zeal” ngu ai Wuhpung Lahkawng hpe mung gaw de da sai rai nga ai. Shi a hpang hkan ni gaw, “Nai mam ni mangai ngai myin shajang nga sai, bungli galaw masha ni n law la ai. Dai majaw, hkau na Madu kaw Shi a yi sun hkau na de amu galaw masha kaja ni law law hpe shangun dat na matu hpyi shawn mu.” (Mahte 9:37-38, Luka 10:2) nga ai Madu a matsun ga hpe madung tawn let galaw sa wa ma ai rai nga ai.

San Pra ai Hannibal Mary di Francia gaw, 1927 ning, June shata praw (1) ya shani, shi a asak (75) ning hta, Madu kaw yup pyaw ban sa mat wa sai rai nga ai. 

Shi n nga mat ai hpang, 1990 ning, October shata (7) ya shani hta dai aten na, Wa Sarabyin Yawhan Pawlu (II) kawn A Lu ai masha hku nna masat shagrau dat ya sai rai nga ai.

Dai hpang, 2004 ning, May shata (16) ya shani, Wa Sarabyin Yawhan Pawlu (II) sha, shi hpe San Pra ai masha tang dat let, Shi a Poi Nhtoi hpe mung, June shata Praw (1) ya shani masat shagrau dat ya sai rai nga ai.

By;

Sister Rose Angeline Maran Nang Doi (SFX)

RVA-Kachin Service (Myitkyina)