San Pra ai Gianna Beretta Molla a Poi Nhtoi (April 28) 28 April 2023

online image

San Pra ai Gianna Beretta Molla a Poi Nhtoi (April 28)

San Pra ai Gianna Beretta Molla gaw, lai a wa sai, 1922 ning, October shata praw (4) ya shani hta, Italy  Mungdan, Milan mare, Magenta kaw shangai chying hkai wa ai rai nga ai. Shi gaw, ma kaji ten kaw nna, makam masham lam hte Hkristan hpung a manu tawn ai hkrang masing ni hpe grai sharawng shara rai hkap la ai. Shi gaw, laika hpaji hpe tang du hkra sharin la nna, shi a makam masham hpe ta tut Kahtawlik Shamu Shamawt Wuhpung “Catholic Actor” kaw shang lawm nna ramma ni hpe madung tawn shakut ya wu ai. Bai nna, shi gaw, San Pra ai Vincent de Paul Wuhpung kaw mung, shang lawm nhtawm, matsan mayan re ai ni a matu, shakut gun hpai amyu shayi tsi sarawun mung rai nga ai.

Shi gaw, 1949 ning hta, Tsi Janmau (Degree of Medicine) hte Machyi Masha Ga Tsi ai Janmau (Surgery) gun la lu nna, 1950 ning hta Mesero mare kaw na Tsi Gawk (Ambulatory Clinic) hpaw hpang ai; shi gaw, lagaw hte seng ai tsi mawan hpaji hpe 1952 ning hta alak mi sharin hkam la lai wa sai. Ma kanu ni, ma kaji ni hte asak kaba sai ni hpe tsi shamai ai amu hpe mung grau n gun dat let galaw ai. Shi gaw, tsi tsi ai amu galaw nga timung, Ramma ni hte Kahtawlik Shamu Shamawt Wuhpung Shang masha hku nna, matut mahkai galaw lai wa ai.

San Pra ai Gianna gaw, 1955 ning hta, Engineer rai nga ai Pietro Molla hte kun dinghku de wu ai. Shan gaw, kashu kasha marai (4) su ma ai. Raitimung, yawn hpa gaw, hpang jahtum ma shangai ai hpang, mali ya na ai shaloi gaw, ma shangai machyi ai wunma hte Sarawun Giana gaw, Madu kaw yup pyaw mat wa sai rai n ga ai.

San Pra ai Sarawun Gianna gaw, jahtum shangai ai Mahkum shata (2) sha naw rai yang, Kan Urerus kaw matswi byin nna kan ga kau ra ai. Shi gaw, ma shangai ai tsi du hpe shi a ma hkum hpe awng dang hkra maga nna ma hpe shangai la lu na matu hpyi shawn ai hte maren, ma hpe atsawm sha shangai chyinghkai la lu sai rai nga ai. Raitimung, ma shangai ai hte seng nna, mayak mahkang naw hkrum na hpe shi tau chye da nga ai. Ma shangai wa na, shawng e sha shi gaw tsidu hpe” Gara hpe lata na lam nga jang lata u; ngai shadut na, ma a asak hpe madaw hkye la lu” ngu nna hpyi shadut wu ai.

Kasha hpungdim Gainna Emmanuela hpe 1962 ning, April shata (21) ya shani shangai la lu sai. Raitimung, Kanu San Pra ai Sarawun Ginna Veretta Mollag aw, 1962 ning, April shata (28) ya shani gaw, madu hta yup pyaw mat wa sai rai nga ai. Shi a asak jaw kau nna ma a asak hpe hke la sai rai nga ai. Shi a labau hpe yu yang, Ma a ntsa kade ram tsawra myit kaba la ai, Kanu Langai a tsawra myit hpe mu mada lu nga ga ai re.

Shi n nga mat ai hpang, 1994 ning, April shata (24) ya shani, dai aten na, Wa Sarabyin Yawhan Pawlu (II) kawn shi hpe A lu ai masha hku nna masat shagra dat ya sai.

Bai 2004 ning, May shata (16) ya shani hta gaw, Wa Sarabyin Yawhan Pawlu (II) sha, shi hpe San Pra ai masha dang dat  let, shi a Poi Nhtoi hpe mung, April shata (28) ya shani madat shagrin dat ya sai rai nga ai.  

 

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

 

Add new comment

9 + 0 =