San Pra ai Ghislain @ Gislenus a Poi Nhtoi (October 10) 10 October 2023

San Pra ai Ghislain @ Gislenus a Poi Nhtoi (October 10)

San Pra ai Ghislain gaw, Belgium mungdan na, Hainault nam maling kata kaw Tawra Jau tai nna tara shadik let nga lai wa sai rai nga ai. “Shinggyim masha gaw, Madu Yesu a kasi kamang ni hpe hkan sa shatup galaw ra ai” nga nna akyu hpyi let myit sumru la lu nu ai. Shi gaw, A.D 650 ning hta San Petru hte Pawlu a tawra jawng hpe hpaw hpang da ya sai. Shi a sak prat hkrun lam malawng maga ngu na aten ni hpe akyu hpyi ai hte shawa a matu galaw daw jau ai amu galaw nna shama kau lai wa sai. Shi kaw hpaji sa hpyi ai ni hpe tang du hkra hpaji jaw ya chye ai.

San Pra ai Ghislain gaw, hkum shing yang rai galu kaba ai wa mung rai nga ai. Dai majaw, shi a npu na Tawra Jau ni gaw arawng la chye ma ai hte n-gun mung grai lu ma ai. Shanhte gaw, shi a sadi sahka myit hte htauli htaula chye ai myit jasat ni a majaw, shi hpe grai nan hkungga la ra let, shi a ntsa kam shamyet myit rawng ma ai.

San Pra ai Ghislain a n-gun jaw, madi shadaw ya ai majaw, San Pra ai amyu shayi Waldetrudis hte kanau jan San Pra ai Aldegondis gaw, Belgium mungdan, Mons hte Maueuge mare kaw Mama Jawng ni hpe gap da lu manu ai. San Pra ai Ghislain gaw, Karai Kasang masha law law a matu, shaning law law amu galaw gun hpai da ai hpang, A.D 680 ning hta Madu kaw yup pyaw ban sa mat wa sai rai nga ai.

Daini Nawku Hpung gaw, San Pra ai Ghislain a Poi hpe galaw nga ga ai hte maren, anhte a myit masin hta mung, shani shagu na asak hkrung hkawmsa lam ni hta Karai Kasang Wa hpe grau nna ten lu jaw hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)