San Pra ai Gertrude a Poi Nhtoi (November 16) 16 November 2023

San Pra ai Gertrude a Poi Nhtoi (November 16)

San Pra ai Gertrude gaw, lai wa sai 1256 ning, January shata (6) ya shani, Germany Mungdan, Eisleben mare kaw shangai chyinghkai wa ai rai nga ai. Shi hpe “Sinna India” ngu ai West India mung na masha ni alak mi rai nna kam shamyet ai San Pra ai Masha mung rai nga ai. Shi gaw, Rodalsdorf mare na, Cistercian Mama Wuhpung ni hpaw da ai Jawng kaw laika hpaji sharin lai wa sai rai nga ai. San Pra ai Gertrude gaw, laili laika hte seng ai hpaji “Literature” hte Myit sawn hpaji “Philosophy” hpe lak san sharin la na matu myit daw dan wu ai.

Shi a asak (26) ning du ai shaloi, Madu Yesu shi kaw shawng na lang shingran sa madun ai. Lana mi na, shi yup maw ai shaloi Madu Yesu shi kaw sa dan pru nhtawm, “Ngai kaw bai wa rit; nye a kabu sharawng hpa lam, Divine delights gaw, na a matu grai dwi ai tsabyi zawn rai na re” nga nna Mugnkan hpaji ni hpe rap di shingdu tawn kau da nhtawm e, Chyoi Pra ai Chyum Laika hte Nawku Hpung a Kawa “Fathers of the Church” ni sharin achyin ya hkrat wa ai hpaji hparat hpe lata la nu ai.

Gertrude gaw, San Pra ai Mechtildis woi awn nga ai wuhpung kaw tara shaja let akyu hpyi myit sumru yu nna aten shalai kau wu ai. Bai nna, kalang mi na shi Chyoi Pra ai Hkum hkam la ai shaloi, Madu Yesu gaw, Getrude kaw bai sa dan pru ai. Ndai mau hpa mabyin ni a lam hpe, “San Pra ai Gertrude a Shingran Laika” nga nna masha law law chye shajang ma ai, “Karai Kasang a Tsawra Matsan dum ai Matsun Maroi Ga ni” ngu ai laika buk kaw ka shalawm da nga ai.

Dai Laika Buk hta Madu hte Wenyi hkungran poi galaw ai lam hte, Madu Yesu a Salum hpe hkungga tsawra ra ai gaw, ahkyak ai lam hpe ka shalawm da nga ai. Shi a laika hta, Madu Yesu a lahpyen kaw shi shang rawng let, Madu Yesu a Salum shamu shamawt nga ai lam mung ka shalawm da nga ai.

San Pra ai Getrude gaw, 1302 ning, shi a asak (46) ning hta, Madu Kaw yup pyaw ban san mat wa sai rai nga ai.

Shi n nga mat ai hpang, 1677 ning hta gaw, dai aten na, Wa Sarabyin Clement (12) kawn, shi hpe San Pra ai Masha ngu dang dat let, Shi a Poi Nhtoi hpe mung, November shata (16) ya ngu nna masat dat ya sai rai nga ai.

Daini Nawku Hpung gaw, San Pra ai Getrude a Poi Nhtoi hpe galaw nga ga ai ten hta, San Pra ai Getrude zawn, Chyoi Pra ai Chyum Laika hpe atsawm sha hti hkaja, sharin achyin la lu hkra shakut nga ga law.

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

 

Add new comment

3 + 6 =