San Pra ai Gerard Sagredo a Poi Nhtoi (September 24) 24 September 2023

San Pra ai Gerard Sagredo a Poi Nhtoi (September 24)

San Pra ai Gerard Sagredo gaw, Italy Mungdan, Venice mare kaw A.D (980) Ning, April shata (23) ya shani shangai chyinghkai wa ai rai nga ai. Rai timung, shi hpe “Hungary mung a Kasa” Apostle of Hungray, ngu nna mung, Venice mare a shawng nnan na makam masham a majaw sat kau hkrum ai wa, “Protomartyr of Venice” nga nna mung, masat shagrau ai rai nga ai. Shi grai naw kaji nga ai aten, Venice mare kaw na, Benedictine Tawra Jau ni a San Giorgio Jawng kaw sa nga lai wa ai. Dai hpang, Yeruslem mare de makam masham akyu hpyi hkrun lam hkawmsa lai wa sai.

Gerard gaw Hugray mungdan de sa du ai shaloi, San Pra ai hkawhkam Stephen kawn, shi a kasha hpe laika sharin ya na matu garum hpyi wu ai. Dai aten kaw nna shi gaw tara hkaw ai lam hta mying grai kaba wa ai majaw, Csanad mare kaw shawng nnan ngu na, Saradaw lit shatsam ya ai hkrum sai. Saradaw Gerard gaw, shi a san seng san pra ai kasi ni a majaw, masha law law hpe Hkristu hpang de woi zinlum la lu ai. Yi sun hkauna galaw ai masha ni gaw, shi kaw hpaji sa hpyi la la rai ma ai.

Hkawhkam Stephen nsa hti mat ai hpang, n hkru n kaja ai ni gaw, Hkristian ni hpe grai n ju n dawng ai amu galaw hpang wa masai. Hpara sumla naw ai hpyen la ni gaw, Hkristian makam masham hkan nang ai ni hpe zingri shatsang wa ma ai. Dai ni zingri ai kaw, San Pra ai Saradaw Gerard mung hkrum katut ra nu ai. 1046 ning, August shata (29) ya shani, shi hpe nri hte galun sat n htawm, shi a hkum tsawp moi mang hpe Danube Hka de kabai bang kau ma ai.

Saradaw Gerard Sagredo n nga mat ai hpang Shi hpe, 1083 ning, hta dai aten na, Wa Sarabyin Gregory (7) gaw, San Pra ai Masha dang dat let, Shi a Poi Nhtoi hpe September shata (24) ya shani ngu masat  dat ya sai rai nga ai.

Daini Nawku Hpung gaw, San Pra ai Saradaw Gerard Sagredo a Poi Nhtoi hpe gawlaw nga ga ai aten, anhte hpung masha ni mung, Saradaw Gerard Sagredo zawn, tinang a makam masham hpe kaning re ai aten hta raitim, gwi gwi sakse hkam lu ai ni byin tai lu hkra sak hkrung hkawmsa nga ga law.

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

Add new comment

9 + 7 =