San Pra ai Genevieve a Poi Nhtoi (January 3) 03 January 2023

San Pra ai Genevieve a Poi Nhtoi (January 3)
San Pra ai Genevieve gaw, Fransik Mungdan a mare daju Paris Mare hpe lak san makawp maga, lanu lahku ya ai San Pra ai Masha ngu nna masat, kam shamyet hkrum ai San Pra ai Fransik amyu shayi rai nga ai. Shi gaw, A.D (422) ning hta Paris mare makau na Nanterre mare kaw shangai chyinghkai wa ai rai nga ai.
England mungdan kaw Pelguis mying ai wa gaw, makam masham hte seng nna shut shai ai hku nna sharin ya ai. Dai shut shi ai sharin shaga lam kaw nna, mung masha ni hpe sa hkye la na matu Auxerre mare na, San Pra ai Saradaw Germaine gaw, England mungdan de rawt sa wa yang, Nanterre mare kaw gan hkring wu ai.
Saradaw gaw, dai mare masha ni hpe makam masham hte seng nna gan shadum sharin ya nga ai shaloi, jut mi kaw dung nga ai Genevieve hpe Saradaw Germaine gaw laksan shaga la nna Genevieve hte seng nna htawm hpang de byin wa na lam ni hpe myithtoi zawn tsun dan wu ai. Shaloi, Genevive gaw, grai sharawng shara rai nna shawa hpawng a man e San Pra ai Saradaw Germaine hpe hpyi nem ai majaw, Saradaw gaw, Genevieve hpe Karai Kasang hpang de Hkawnsek shaman chyeju jaw ya na matu, akyu hpyi shaman da ya wu ai.
San Pra ai Saradaw Germaine kawn Genevieve a san seng san pra ai sak hkrung nga ai ladat hpe tau nna tsun da ai hpe mabyin langai mi gaw sakse tai ya nga ai. Makam masham n nga, n shawp dik ai Attila mying ai hpyen du langai mi Paris mare hpe sa shamyit kau na matu htim sa wa ai; dai majaw, mare masha ni hkrit nna hprawng yen mat na matu bawng ban nga ma ai.
Shaloi Genevieve gaw, Mare masha ni hpe mare kaw na n hprawng yen mat ai sha, lusha gam let Karai Kasang kaw akyu hpyi na matu hpaji jaw dat wu ai. Genevieve hpyi shawn ai ga hpe madat nna shatup ya ma ai majaw, mare masha ni gaw, Atilla a lata kaw nna angwi apyaw hte sha lawt lu ma ai. Tai hpyen ni gaw, shi chyu shi hkrit tsang myit rawng wa nna bai nhtang wa mat ma ai.
San Pra ai Genevieve asim sha rai nga chye ai; akyu hpyi shaja ai, matsan dum lama ai amu magam ni hpe aten tup galaw ai lam hta grai mying dan hkung ai San Pra ai Hkawnsek rai nga ai.
Shi gaw, A.D (512) ning hta Madu kaw yup pyaw ban sa wa sai rai nga ai. Shi hpe Nawku Hpung gaw, San Pra ai Hkawnsek ngu nna masat ya let shagrau hkungga ai rai nga ai.
Shi n nga mat ai hpang, Nawku Hpung gaw, Shi hpe San Pra ai masha dang dat let, shi a Poi Nhtoi hpe January shata praw (3) ya masat shagrau dat ya sai rai nga ai.
Daini Nawku Hpung gaw, San Pra ai Genevieve a Poi Nhtoi hpe galaw nga ai shaloi, anhte Hpung Masha ni mung, tinang lu da sai makam masham hpe kaning re ai ahkying aten hta mi raitim, sak se hkam let, hkan sa shatup lu ai ni byin tai lu hkra shakut sa wa nga ga law.

By;
Sister Rose Angeline Maran Nang Doi (SFX)
RVA-Kachin Service (Myitkyina)

Laika Ngau Website Link:
#RVA_Kachin_Service
#Feastday_January3
#St_Genevieve