San Pra ai Fursey a Poi Nhtoi (January 16)

San Pra ai Fursey gaw, Karai Kasang a amyu sha ni a matu, ap nawng myit hpe madung tawn nna amu magam gun hpai lai wa sai rai nga ai. San Pra ai Bede ka lajang da ai “Nawku Hpung hte seng ai Labau (Ecclesiastical History) Laika kaw e, San Pra ai Fursey gaw, atsam marai rawng ai, kaja ai lam hta asum n jaw chye ai, shakut sharang myit raw ai a majaw, England hte Fransik Mungdan kaw na Irish amyu sha ni San Pra ai ai masha byin tai wa ai ni kaw malawm langa mi mung rai nga ai,” nga nna ka da nga ai re.

San Pra ai Fursey gaw, Ireland Mungdan, Munster mare kaw A.D 567 ning hta shangia chyinghkai wa ai rai nga ai.

San Pra ai Fursey gaw, Jau tai nna Hpung Gawan ai amu hpe grai myit sharawng let gun hpai lai wa sai. Ireladn Mungdan chyam hkra (12) ning tup tara hkaw hkam ai hte Jau tai Jawng Law law hpaw da ya lai wa sai. Nawku amu hta Ireland hte Fransik Mugndan ni hta grai shakut gun hpai lai wa sai mung rai nga ai.

Shi gaw, shingran law law mung mu yu nu ai. Dai lam ni hte seng nna, shi a hpang hkan ai ni tsun dan ai majaw ai hte shi hkum nan ka lang da ai, “Fursey mu ai Shingran ni” (Visions of Fursey) laika kaw mu hti lu nga ai re. Laika dai kaw e, satan hte shi a salung sala ni laja laja rai nna gung lau jaw ai lam, Karai Kasang a atsam shing kang ni a lam, Sumsing lamu ja mungdan hte ngarai di a shingran ni shalam ka da nga ai.  

San Pra ai Fursey gaw, dai zawn Sasana magam hpe gun hpai hkawm sa nga ai aten A.D 650 ning hta Madu kaw yup pyaw ban sa mat wa sai rai nga ai. Shi a moi mang hpe Peronne mare e makoi mayang da ai rai nga ai. Shi a lupwa kaw na lamik kumla law law byin pru ai lam labau hta ka da nga ai.

Shi n nga mat ai hpang, Nawku Hpung gaw, shi hpe San Pra ai Masha dang dat let, shi a Poi Nhtoi hpe mung, January shata (16) ya shani masat shagrau dat sai rai nga ai.

Daini Nawku Hpung gaw, San Pra ai Fursey a Poi Nhtoi hpe galaw nga ai aten, anhte a myit masin hta mung, Karai Kasang Wa shi jaw ai lit magam hpe aput apai lam n nga ai sha, shakut hkawmsa lu na atsam jaw ya rit ga matu, akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)