San Pra Ai Francisca A Labau Lam ( 29 October, 2019 )

San Pra Ai Francisca A Labau Lam

          Nu wa hpu nau ni, San Pra ai Francisca gaw, ngwi pyaw ai dinghku hpe gaw de ai, kasi la mai ai kun dinghku ngu, Nawku hpung kawn nna, shakawn shagrau hkrum ai jan rai nga ai. Francisca gaw, Lorenzo ngu ai wa hte hkungran dinghku de nna, shi a dinghku bungli magam lam shagu hta kang ka kup tsup ai hte hkan galaw sa nga ai jan mung rai nga ai. Dinghku prat tup hta, shi a ningrum ningtau wa Lorenzo hte galoi mung gali galaw nru nra byin ai lam n nga ai, si mani ai hte kanawn mazum, shada tsawra hkung ga nna, shaning (40) ning tup rau nga lai wa sai raitim, kashu kasha nsu ma ai lam chye lu ai. Shingrai, makau grup yin kun dinghku num ni a matu kasi kaja tai nna nga lai wa sai jan mung rai nga ai. Francisca galoi mung tsun tsun re ai ga mung nga nga mali ai. Dai gaw, hpa ta nga jang, “Nawku tawn a man e chyu sha Karai Kasang hpe mu hkrum na nrai, dinghku amu hta atsawm sha galaw yang, Madu Karai Kasang hpe mu lu na re”, nga nna, tsun tsun rai nga ai. Dai majaw, lani mi hta Francisca akyu hpyi laika hti nga ai ai shaloi, amu kaji kajaw a matu, akyu hpyi laika yan mi pyi nlu hti hkra, ya sha ya sha shaga dat dat rai nga ai. Francisca gaw, daizawn akyu hpyi ga ni hpe atsawm nlu hti ai raitim, masin pawt ai lam n nga, shi hti nga ai akyu hpyi laika hpe tawn da nna, sa yu yu rai nga ai. Ya na zawn bungli magam ni hpe sa yu ngut nna, shi a akyu hpyi laika hpe bai wa hti nga nu ai.

          Nnan sha naw akyuhpyi laika hti wa yang, Francisca hpe bai shaga manu ai. Francisca mung, myit galu kaba hte shi hpe sa shaga ai ni hpang de hkan yu ya ya di nu ai. Daizawn, 3, 4 lang ngu na daram wa yu ai hpang, akyuhpyi laika wa hti ai shaloi, shi a akyuhpyi laika buk na ga si ga yan ni yawng hpe, ja hte ka da ai hpe wa mu nu ai. Dai shaloi Francisca grai mau mat nna, Karai Kasang a hpung shingkang hpe shakawn nga nu ai. Nu wa ni, ndai mabyin gaw, kaja wa nan teng sha byin lai wa sai mabyin rai nga ai lam Nawku hpung a labau hta daini du hkra matsing da ai hpe mu chye lu nga mali ai re. Ndai zawn mau hpa chyeju hpe mu lu ai gaw, Francisca a Madu Karai Kasang hpe tsawra hkungga shakawn chye ai, san seng ai myit masin hte ap nawng shakut ai, Tsawra matsan dum chye ai, ru yak jam jau hkrum nga ai ni hpe garum shingtau chye ai hte shi galaw shakut nga ai magam bungli shagu hpe Karai Kasang kaw ap da let, shakut ai majaw, lak lai ai shaman chyeju hpe hkam la lu ai lam nan rai nga ai. Francisca gaw, shi a ningrum ningtau wa hpe mung tsawra myit kaba hte ra mara galaw lajang ya ai sha n ga, Kun dinghku magam bungli hta mung nhprai let, manaw manang htingbu htingbyen ni yawng kasi la mai ai dinghku num kaja langai hku nga lai wa sai rai nga ai.

          Shingrai, yawng gaw, Francisca hpe tsawra hkungga, kam hpa nga ma ai lam shi a labau hta matsing da nga mali ai nu wa ni. Ya na zawn Francisca a san seng ai myit masin a majaw, shi a lamu kasa hpe mu lu ai rai nga ai. Dai majaw, Francisca a makau hta dai lamu kasa gaw galoi mung Francisca a makau kaw tsap let, makawp maga ya nga ai hpe mu lu nu ai. Kalang lang nmyit mada ai sha Francisca masin loi loi pawt jang, dai lamu kasa shi a makau kawn hpawng mat mat re ai hpe mu lu ai lam, labau hta hpaw tsun da nga ai. Bai nna, manaw manang ni a nkaja ai lam, shatan nhkan galaw jang mung, shi a lamu kasa kaya nna, myiman magap kau kau re ai hpe Francisca shi hkum nan mu lu nga ai. Dai majaw, Francisca a man hta n kaja ai lam hpa n mai galaw ai, nga nna, hpaw tsun da ai hpe mu hti lu nga mali ai re. Francisca gaw, shi a ningrum ningtau wa hte sadi dung let, dinghku prat hpe ap nawng nga ai ten, Madu a shaning (1438) ning hta Francisca a ningrum ningtau wa, Madu hta yup pyaw ban san mat wa sai rai nga ai. Shingrai, myit yawn myit kaji let ngam nga ra mat sai. Ya na zawn shi a myit kaji Karen ai hpe, Madu Karai Kasang kaw sha akyu hpyi let shalan shabran nga nu ai. Bai nna, shi galoi mung grai kam hti ai akyuhpyi laika ni hpe hti nna, shi a myit hpe shalan shabran la nga sai.

          Maga mi de mung, shi hpe garum hpyi ai ni yawng hpe nrau ai, nkam ai ngu ai n nga, garum ya nga ai. Shi a san seng ai myit masin hpe mai byin ai made, yawng hpe garan gachyan nga ai lam makau grup yin na htingbu htingbyen ni hpaw tsun sak se hkam da nga ai lam chye lu ai. Ndai zawn san seng ai myit masin hte shakut nga ai Francisca gaw, madu wa n nga mat ai hpang, nmyit mada ai lani mi hta, kyepdin raw kau nhtawm me, shi a du hta sumri hte gali nna, Mama Jawng de sa wa nu ai. Shi a prat hpe Mama prat hte ap nawng na matu, ahkaw ahkang hpyi shawn nu ai. Shingrai, Mama prat hte seng ai machye machyang lam ni hpe sharin hkam la nna, ngam nga ai shi a sak prat hpe Mama prat hte matut ap nawng shakut na matu, myit hkrut kau nu ai. Francisca a san seng ai myit masin hte tsawra matsan dum chye ai magam bungli a majaw, nau nna ai sha Mama part hpe hkam la lu sai rai nga ai. Ya na zawn Mama prat hte ap nawng nga ai (2) ning sha naw rai yang, Madu woi la ai hkrum sai rai nga ai. San Pra ai Francisca Madu hta yup pyaw mat wa ai shaning gaw, (1440) ning hta rai nga ai. Chyoi Pra ai Kahtawlik Nawku hpung kawn nna, San Pra ai Francisca a poi nhtoi hpe March Shata (9) ya shani ngu masat da ya sai re. Shingrai, Nu wa hpu nau ni, anhte yawng mung San Pra ai Francisca a kasi hpe la let, mai kaja ai magam lam hta shakut nga ga ngu, n gun jaw mayu n ngai. Grau nna, kun dinghku ni hta n hkrum nra byin wa ai ten, San Pra ai Francisca hpe myit dum let akyu hpyi la ga. Kun dinghku ni hta n gau nlau nhkrum u ga matu mung, San Pra ai Francisca kaw myitdum akyu hpyi nga ga ngu, n gun jaw let, lamang hpe ndai kaw naw jahkring sai rai.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.