San Pra ai Francis de Sales a Poi Nhtoi (January 24) 24 January 2023

San Pra ai Francis de Sales a Poi Nhtoi (January 24)

          San Pra ai Francis de Sales gaw, Fransik Mungdan, Savoy Mare kaw lai wa sai 1567 ning, August shata (21) ya shani hta shangai chyinghkai wa sai rai nga ai. Htawm hpang de, shi gaw Geneva mare kaw Saradaw kaba aya tang da hkrum sai rai nga ai.

Francis de Sales gaw, Kaji ai ten kaw nna shi a hkum hpe Karai Kasang kaw ap kau wu ai. Shi a prat hta san seng san pra rai sak hkrung nga lu na shaman chyeju lu la na matu, Nu Maria kaw garum hpyi ai hte shi a hkum hkrang hpe mung Nu Maria kaw ap da wu ai.

Francis de Sales gaw, shaning ram ram na hkra Paris mare kaw hpaji sharin hkaja la nna, shi a asak (24) ning du ai shaloi, Padua mare na Dakkasu kaw matut hpaji sharin hkam la nna, dai dakkasu kaw na hpaji ning hkring jan mau (Doctorate) hpe lu la wu ai.

1593 ning hta, shi sharawng dik ai hte maren, Jau tai jawng sa lung na matu, shi a kawa kaw na ahkang lu la nu ai. Shi Jau tai nna, kade nna yang, Geneva hkanawng a ding dung Maga na grai hkrit tsang ra dik ai Chablais mare kaw Sasana magam gun na matu, lit shatsam ya ai hkrum sai. Dai mare gaw, Nawku Hpung hpe sinat laknak ni lang nna nan jam jau jaw hkawm ai Protestant hpung masha ni nga ai shara rai nga ai.

Jau Francis gaw, maka n kap sam nnang ai masha ni hpe hkrit tsang ra ai majaw, hpun ntsa kaw lana mi yup lai wa yu sai lam, shi a labau hta mu hti lu nga ai. Hpang jahpawt si wa na zawn rai taw nga ai Jau Francis hpe Calvin hpung masha ni sa mu la ma ai. Jau Francis gaw, dai masha ni a ntsa hpunau tsawra myit kaba tawn ai hte shi a hpaji machye machyang atsam ni a majaw, Calvin Protestant hpung  masha ni myit galai shai wa nna, Nawku Hpung de bai shang wa manu ai.

1595 ning hta, gumhpraw jaw nna shi hpe sat shamyit kau na masha ni a lata kawn lahkawng lang grai mau hpa hte lawt wa lu nu ai. Shi gaw, hpung gawan hkawm ai aten ni hta mung, makam masham hte seng ai laika ni matut ka let, hpung gawan hkawm chye nga ai.

Chablais mare de shi nnan du ai shaloi, mare ting hta Hpung Masha marai (20) sha nga ai; Raitimung, mali ning na ai hpang, Hpung Masha hkying lam law jat wa sai rai nga ai. Ndai zawn shi a Hpung amu gun awng dang ai lam madung san hkrup ai shaloi, shi gaw: “Hpu nau tsawra myit hpe madung tawn let, shada da a lapran na n bung pre shai hkat ai lam hte seng nna ga hkaw mi mung n tsun ai ladat gaw, sasana magam awng dang lu dik ai ladat re.” nga nna mahtai jaw ya wu ai.

1602 ning hta Jau Francis gaw, Geneva mare kaw na Saradaw aya tang da ai hpe hkrum sai. Saradaw Francis gaw, aten tup mara raw ya ai, makam masham lam, tara ga sharin ya ai amu hte sak hkrung nga lai wa sai. Shi ka da ai laika ni hpe hti yu ai shaloi, “Karai Kasang hpe tsawra ai” ngu shadum ai hkrai rai nga ai hpe mu lu nga ai.

Saradaw Francis de Sales gaw, 1622 ning, December shata (28) ya shani hta, Lyons mare kaw nga taw ai shaloi, Madu hta e yup pyaw ban sa wa sai rai nga ai.

Saradaw Francis de Sales n nga mat ai hpang, 1661 ning, January (8) ya shani hta, dai aten na Wa Sarabyin Alexander (VII) kawn, Shi hpe A Lu ai masha ngu masat shagaru dat ya sai.

Dai hpang 1665 ning, April shata (8) ya shani hta, Wa Sarabyin Alexander (VII) sha, Shi hpe San Pra ai masha dang dat ya let, Shi a Poi Nhtoi hpe mung, January shata (24) ya shani masat shagrau dat ya sai rai nga ai.

Daini Nawku hpung gaw, San Pra ai Saradaw Francis de Sales a Poi Nhtoi hpe galaw nga ai aten, anhte a myit masin hta mung, hpunau tsawra myit ni hpe bang da let, tinang a makau grup yin ni hpe tsawra myit madun lu ai ni rai wa lu u ga matu, lak san akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)