San Pra ai Franca Visalta a Poi Nhtoi (April 26) 26 April 2023

online image

San Pra ai Franca Visalta a Poi Nhtoi (April 26)

San Pra ai Franca Vislata gaw, lai a wa sai, 1170 ning hta, Dingdung Italy Mungdan, Piacenza mare kaw shangai chying hkai wa ai rai nga ai. Shi a asak (7) ning sha naw rai ai aten kaw nna, shi a daidaw buga, Piacenza mare kaw na, San Pra ai Syrus Benedictine Mama Jawng de shang mat wa nu ai. Shi a asak (14) nng hta Mama ga sadi tawn mat sai.

Shi gaw, akyu hpyi shaja ai, madat mara ai, tinang a myit hpe hkang chye ai myit jasat ni hte seng nna grai myit dan hkung ai jan mung rai nga ai. Manang ni hpe mung, akyu hpyi shaja na hte yak hkak lam ni hpe hkam sharang let, Lusha gam na matu shadum ya chye nga ai. Shi gaw, Mama Kaba lit kaba shatsam ya hkrum timung, shi a hkan sa tara ni nau ja nna hkan shatup na yak ai majaw, dai lit hpe shi na na n gun hpai lu mat ai. Ndai zawn amu jahkring kau hkrum timung, dai Mama Jawng kaw nan akyu hpyi shaja ai hte yak hkak lam ni hpe kabu gara hkam sharang let nga mat wa nu ai.

Mama Franca a hkan sa tara hpe ning hkap ai ni nga ai zawn, masha law law mung, shi a san seng san pra ai myit jasat hpe shakawn shagrau ya ma ai. Dai ni kaw Cistercian Mama Jawng de shang mat ai, Carentia mying ai amyu shayi sha mung rai nga ai. Carentia a kanu kawa ni gaw, Cistercian Mama ni a matu nta langai mi gaw gap ya ma ai. Franca hpe dai Cistercian Mama ni saw shaga nhtawm, dai jawng a ningbaw shatai ma ai; dai jawng kaw Carentia mung nga nga ai.

Shi gaw, 1218 ning hta, Italay Mungdan, Pitoli Mare kaw na, Madu hta yup pyaw mat wa sai rai nga ai.

Shi n nga mat ai hpang, 1273 ning hta dai aten na, Wa Sarabyin Gregory (X) gaw, shi hpe San Pra ai masha dang dat let, Shi a Poi Nhtoi hpe mung, April shata (26) ya shani ngu masat shagrau dat sai rai nga ai.

Daini Nawku hpung gaw, San Pra ai Franca Vislata a Poi Nhtoi hpe galaw nga ga ai hte maren, anhte hpung masha ni mung, asak hta n hkan ai sha, dang lu ai atsam hte Karai Kasang WA a sasana magam hta shang lawm shakut ai ni byin tai lu hkra shakut sa wa ga law.

 

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

 

Add new comment

1 + 2 =