San Pra ai Florian a Poi Nhtoi (May 4) ( 04 April 2022 )

San Pra ai Florian a Poi Nhtoi (May 4)

San Pra ai Florian gaw, Roma Hkawhkam Diocletian kawn Makam Masham a majaw Nawku Hpung hpe sat zingri shamyit ai aten hta sak hkrung nga lai wa ai San Pra ai Masha rai nga ai. Shi gaw, Austria Mungdan kaw na, Roma asuya hpyen du kaba, Noricum Mare hpe uphkang ai uphkang du kaba mung rai nga ai.

Hkristan Hpung Masha ni hpe Roma hpyen la ni rim ai shaloi Florian gaw, ngai mung Hkristan Hpung masha re, nga nna n hkrit n tsang sha ginwang up du hpe tsun lai wa ai. Dai majaw, Roma asuya gaw, Shi hpe zingri shatsang ai, hkum kaw na hpyi ni gawng kau ya ai hpang du kaw nlu kaba gyit noi ya nhtawm Ennas Hka kata de kabai bang kau ma ai. San Pra ai Florian a moi mang hpe Augustinian Jau ni a jawng wang hta e makoi mayang da ma ai.

Shi n nga mat ai hpang Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, May shata praw (4) ya shani masat shagrau dat ya sai rai nga ai.

San Pra ai Florian hpe Poland Mungdan hte Austria Mungdan lahta daw hpe laksan makawp maga ya ai San Pra ai Masha ngu nna kam shamyet nga ai rai nga ai. San Pra ai Florian gaw, Madu Yesu hpe kam sham ai lam hta n hkrit n tsang ai sha, nde ja ja rai nna sakse madun ya na matu, anhte Hkristan Hpung Masha ni hpe kasi kamang madun ya ai wa mung rai nga ai. Kabu gara aten hte myit ru myit yawn hkrum ai shaloi, Madu Yesu hpe sadi dung na matu hte Madu a Mungdan lam hkaw shachyam shabra let sakse tai na matu, anhte hpe kasi madun ya nga ai.

Daini, Nawku Hpung gaw, Hpyen Du Kaba San Pra ai Florian a Poi hpe galaw nga ga ai hte Maren, anhte hpung masha ni mung, tinang lu da sai Hkristan Makam Masham hpe San Pra ai Florian zawn, ru yak ten hta raitim, ngwi pyaw ai ten hta raitim, ta tut sak se hkam ai ni byin tai lu hkra shakut sa wa ga ngu n gun jaw gam garan ya dat n ngai law.

By;

Sister Rose Angeline Maran Nang Doi (SFX)

RVA-Kachin Service (Myitkyina)