San Pra ai Flora a Poi Nhtoi (October 5) 05 October 2023

San Pra ai Flora a Poi Nhtoi (October 5)

San Pra ai Flora gaw, 1309 ning hta, Francis Mungdan (Ya Pin-tit) kaw shangai chyinghkai wa ai rai nga ai. Flora gaw, sumsing lamu kaw na shaman chyeju ni law law lu la ai, hkawn sek rai nga timung, shagrit shanem myit grai rawng nga ai. Masha law law shi kaw hpaji sa hpyi la ma ai. Ma kaji ten kaw nna shi gaw, Madu Yesu hpe alak mi nan kam shamyet ai myit jasat rawng ai. Kanu yan Kawa shi hpe dinghku de ya na matu, law law lang tsun yu ai raitimung, shi n hkraw ai. Shi a hkum hpe Madu Yesu kaw sha ap kau nhtawm, Hkristian makam masham a magam gun tai na matu myit jahkut daw dan kau wu ai.

Flora gaw, Yerusalem mare na, San Pra ai Yohan “St. John of Jerusalem” de da ai Tsirung Amu Gun Mama” (Hospitaller Nun) Magam Gun Wuhpung kaw shang mat wa ai. Dai jawng kaw myit htum na daram ayak ahkak, myit ru yawn hkyen lam ni hkrum katut lai wa sai raitimung, Madu Yesu hta kamhpa ai myit ngang ai majaw, shi a myitru yawn hkyen lam ni hpe ninghkap kau lu wu ai.

Mau hpa shaman chyeju law law shi hkam la lu sai. Kalang mi na San Pra ai Ni Yawng Mayawng a Poi Nhtoi (November praw 1 Ya) shani hta, grai mau hpa byin shi hkrum lai wa ai. Dai shani kaw nna, San Pra ai Cecilia a Poi Nhtoi rai nga ai, November shata (22) ya shani du hkra Flora gaw, malu masha hpa mung nlu n sha ai sha nga lai wa nu ai. Bai nna, Chyoi Pra ai Wenyi a lam myit sumru akyu hpyi nga ai shaloi, ga ntsa na pe (4) daram tsaw ai kaw hpat wat tsap wa ai mung law law lang rai nga ai. Wudang ntsa Madu Yesu a garep nhkrem kaw na pru wa ai sai zawn, Flora a Garep hte n-gup kaw nna mung sai ni law law lang pru lai wa ai.

Shi tsun ai ga hta, “Karai Kasang Wa hpe ngai a kasi la hpa langai hku nna hkam la lu ai hte shi a myit ra ai hku nna sak hkrung hkawmsa lu na matu myit mada ai. Hpang jahtum, Karai Kasang Wa a tsam a marang e, shing gyim masha ni a sak hkrung lam hpe tau nau mu chye lu ai atsam lu la ni ai” nga nna tsun lai wa yu ai lam, shi a labau hta ka matsing da nga ai.

Dai zawn rai nna, Karai Kasang Wa a lit magam gun hpai nga ai aten, 1347 ning hta Madu kaw yup pyaw ban sa wa sai rai nga ai. Shi hpe makoi mayang da ai Lupwa kaw na, lamik kumla law law mung byin pru wa sai rai nga ai.

San Pra ai Flora n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, October shata (5) ya shani ngu masat shagrau dat ya sai rai nga ai.

Daini Nawku hpung kaw nna, San Pra ai Flora a Poi Nhtoi hpe galaw nga ga ai hte maren, anhte a sak prat hkrun lam hta, anhte a myit ra ai hku nrai, Karai Kasang Wa a myit ra ai hku nna sak hkrung hkawmsa lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)