San Pra ai Flannan a Poi Nhtoi (December 18) 18 December 2022

San Pra ai Flannan a Poi Nhtoi (December 18)

San Pra ai Flannan gaw, Ireland Mungdan na, Thomond Ginwang up Turdough a kasha rai nga ai. Shi gaw, tsa ban (7) ram hta sak hkrung lai wa sai lam labau hta ka da nga ai.

Shi a shawng na Sara gaw, Tawra Jau langai mi rai nga ai majaw, kaji ai ten kaw nna makam masham myit ngang wa lu sai. Shi a Sara Tawra Jau gaw, shi hpe laika hpaji hta galaw lu galaw sha bungli hpe madung tawn nna sharin ya sai. Shi gaw, Karai Kasang hpe hkrit hkungga tsawra chye ai myit, bungli galaw shaja ai myit jasat hte matsan dum lama ai bungli galaw shaja chye nga ai.

San Pra ai Saradaw Flannan a labau hpe hti yu ai shaloi, anhte gaw masha ni e jahpoi asawng ai, n gawn n sawn di ai hpe hkrum chye ga ai lam chye lu ai. Shi Jau tai jawng de shang ai shaloi shi a nta masha ni, makyin jinghku ni, manaw manang ni shi hpe grai yu kaji let jahpoi lai wa ma ai. Dai ni yawng hpe shi myit asim sha tawn nna hkam sha kau ai. Jau tai wa ai hpang, Roma mare de akyu hpyi sa du ai; dai shaloi Wa Sarabyin Yawhan (4) gaw, Jau Flannan hpe Saradaw aya dang dat ya sai.

Saradaw Flannan gaw, dai daw buga Ireland mungdan de bai du wa ai hpang, Killaloe mare kaw na shawng ning nan na Saradaw tai wa sai. Shi gaw, Karai Kasang a magam gun majing myit jasat rawng ai; tara mungga hkaw matsun ai lam hta mung grai ning tawn ai wa rai nga ai. Shi a kawa hpe mung, makam masham hkap la lu hkra shadum ya lu ai sha n-ga, kawa gaw hpang de, Tawra Jau langai mi tai mat wa sai, rai nga ai.

Saradaw Flannan gaw, dai zawn rai nna, Karai Kasang a magam bungli hpe kang ka let gun hpai nga ai aten, A.D 778 ning hta Madu kaw yup pyaw ban sa mat wa sai rai nga ai.

Saradaw Flannan n nga mat ai hpang, Nawku hpung kawn, Shi hpe San Pra ai Masha dang dat let, Shi a Poi Nhtoi hpe mung, December shata (18) ya shani ngu masat shagrau dat ya sai rai nga ai.

San Pra ai Wa Saradaw Flannan a labau kadun hpe madat hkaja la let, anhte a shani shagu na sak hkrung hkawmsa lam hta mung, tinang lu da ai makam masham hpe tinang a makau grup yin na manaw manang makin jinghku ni hpe mung, gam garan ya lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)

#RVA_Kachin_Service

#Feastday_December18

#St_Flannan_Bishop