San Pra ai Fiacre a Poi Nhtoi (August 30) 30 August 2022

San Pra ai Fiacre a Poi Nhtoi (August 30)

San Pra ai Fiacre gaw, Ireland Mungdan kaw shangai wa ai rai nga ai. Uropa Dan de shi du sa wa ai shaloi Fransik Mungdan, Meaux mare na, San Pra ai Saradaw Faro gaw, shi hpe amu galaw sha na shara jaw ya ai. Fiacre mung, shi a buga Ireland mungdan kaw nga yang na zawn, asim sha tara shadik shaja nna dai lamu ga kaw amu galaw sha nga wu ai. Makau mayang hkan nga shajang ai ni gaw, Fiacre a lam na nna shi kaw sa wa nhtawm, Hkristan Makam Masham a lam san sagawn la ma ai.

San Pra ai Fiacre gaw, dai masha ni hpe grai matsan yu dum ai. Saradaw Faro mung, shi hpe lamu ga bai jaw ya ai; dai shara hta e, shi kaw du sa wa ai ni nga na matu nta gap da ya ai. Shanhte gaw, yi sun hkauna galaw nna, hkaulan mam hte namlap namlaw ni hkai sha ma ai. Shi a lata hta makam masham de lu woi la tawn ai masha wunawng a matu shi hta lit nga wa ai. Masha wunawng gaw, shi hpe yi sun hkauna galaw sha ai masha nga nna grai hkungga tsawra ma ai.

San Pra ai Fiacre gaw, A.D (675) ning hta Madu kaw yup pyaw ban sa mat wa sai rai nga ai. Shi a hpang hkan ai ni gaw, tsa ban (17) du hkra grai law htam jat wa ma ai.

San Pra ai Fiacre a gawknu, Shrine de akyu hpyi la na matu sa ai masha ni a shawng hkring sa shara rai nga ai, St. Fiacre Hotel makau kaw gumra leng daru langai mi nga ai. Dai aten hta jawn ai Shaprai mali leng (Four-wheeled cab) hpe Fiacre ngu nna shamying ya ma ai. San Pra ai Fiacre hpe “Sun galaw sha ai ni hte Leng gawt ai ni lak san kam shamyet ai San Pra ai Masha” (Patron of Gardeners and Cabdrivers) ngu nna masat shagrau da sai rai nga ai.

San Pra ai Fiacre n nga mat ai hpang, Nawku Hpung kawn Shi hpe San Pra ai Masha dang dat let, Shi a Poi Nhtoi hpe mung, August shata (30) ya shani hta masat shagrau dat ya sai rai nga ai.

Daini Nawku Hpung gaw, San Pra ai Fiacre a Poi Nhtoi hpe galaw nga ga ai aten hta, anhte hpung masha ni mung, tinang kaning re ai asak aprat hte hkawmsa nga ai raitim, San Pra ai Fiacre zawn, kasi kaja madun lu ai hkristu a hpang hkan kaja, hkristan hpung masha ni byin tai nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)