San Pra ai Eugene de Mazenod a Poi Nhtoi (May 21) 21 May 2023

San Pra ai Eugene de Mazenod a Poi Nhtoi (May 21)

San Pra ai Eugene de Mazenod gaw, Oblates of Mary Immaculate (Shing n rai) Npawt Shut Hpyit Mara N-Kap ai Nu Maria a Magam Gun Wuhpung ni shachyen da ai bungli ni hpe matut galaw wu ai. Shi gaw, Fransik Mungdan, Aix-en-Provence mare hta 1782 ning, August shata praw (1) ya shani shangai chyinghkai wa ai rai nga ai. Jau tai jawng kaw hpaji sharin la ngut ai hpang, Jau aya dang da hkrum nu ai. Jau tai ai hpang, shi a daidaw buga na matsan dik ai masha ni hpe yu gawn ai lit gun wu ai. Dai masha ni matsan prat kaw naw sak hkrung nga ai gaw, Fransik Rawt Malan (Shing n rai) French Revolution a gaw mai gaw sha majaw rai nga ai.

Jau Eugene a akyu hpyi myit jasat, shagrit shanem myit, bungli galaw shaja ai ladat hte shi galaw ai bungli shagu hta myit lawm let shakut galaw ai majaw, shi a kasi hpe yu la nna hpang hkan ni grai law wa ma ai. Dai majaw, shi a hpang hkan nang ai ni hte rau Missionaries of Provence mying ai “Provence Sasana-magam Gun Wuhpung” shabyin shatai ya lu nu ai.

Dai hpang, San Pra ai Eugene gaw, Marseilles mare na Saradaw lit shatsam ya ai hkrum wu ai. Shi gaw, shi a ginwang hta Nawku Jawng ni, Jau Ginwang (Parish) ni hpaw jat nna, ramma ni a matu tara ga sharin ai dabang ni law law galaw ya ai. Dai hpang, shi gaw, Oblates of Mary Immaculate mying ai “Npawt Shut Hpyit Mara N Kap ai Nu Maria Magam Gun Wuhpung” hpe gaw de hpang dat sai.

Dai Wuhpung shang ai ni gaw, Saradaw Eugene a kasi hpe hkan nna bungli gun hpai lai wa ma ai. Dai Oblates Magam Gun Wuhpung gaw, 1841 ning hta Mungdan manga de Sasana magam gun na matu rawt sa mat wa manu ai. Shanhte a sasana magam grai awng ai majaw, masha law law Hkristu Madu hpang de du wa ma ai. Shanhte hpe Sarabyin Pius (11) gaw, “The specialists of difficult missions (shing n rai) Yak Hkak La ai Sasana Magam hte Seng nna Magrau Grang ai Share Shagan ni” ngu nna shing teng amying jaw dat wu ai.

 San Pra ai Saradaw Eugene gaw, 1861 ning, May shata (21) ya shani, Madu hta yup pyaw ban sa mat wa sai rai nga ai.

Shi n nga mat ai hpang, 1975 ning, October shata (19) ya shani, Wa Sarabyin Pawlu (6) kawn shi hpe, A lu ai masha (Blessed) hku nna masat dat ya sai rai nga ai.

Dai hpang, 1995 ning, December shata (5) ya shani, dai aten na San Pra ai Wa Sarabyin Yawhan Pawlu (2) kawn Shi hpe San Pra ai masha dang dat let, Shi a Poi Nhtoi hpe mung, May shata (21) ya shani masat shagrau dat ya sai rai nga ai.

Daini Nawku Hpung gaw, San Pra ai Saradaw Eugene a Poi Nhtoi hpe galaw nga ai aten hta, anhte Hpung Masha ni mung, tinang dinghta asak naw hkrung nga ai aten hta, Wa Saradaw Eugene a kasi hpe la let, mai kaja ai magam bungli galaw shakut hkawmsa lu ai ni byin tai lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)