San Pra ai Ethelbert a Poi Nhtoi (February 24) 24 February 2023

San Pra ai Ethelbert a Poi Nhtoi (February 24)

          San Pra ai Ethelbert gaw, kaji ai ma prat ten hta tara maigan masha langai mi rai nga ai. Shi gaw, England Mungdan, Kent mare kaw na, Jutish Htinggaw na Hengist a aru arat rai nga ai. Shi a madu jan gaw, Hkristian hkawhkam kasha rai nga ai majaw, England Mungdan de e, Centerbury mare kaw na, San Pra ai Augustine du nga ai aten ang ai majaw, Hkawhkam Ethelbert gaw, Hkristian masha byin tai wa sai rai nga ai.

Fransik hkawhkam Charibert gaw kasha hkawhkam shayi Bertha hpe Kent mare na Hkawhkam Ethelbert kaw jaw sha ai shaloi kaw nna nan: “Nye a Kasha Bertha gaw shi a makam masham hpe England mungdan kaw wangle wanglang kam sham shangun lu na rai nga ai.” nga nna tau hkrau tsun da nu ai. Ndai gaw, Anglo-Saxon ni up hkang ai England mungdan de Hkristian makam masham shawng nnan shang wa lu ai nan rai sai. England mungchying sha ni hpe Hkristian makam masham de woi jashawn la na matu shakut shaja ai, San Pra ai Augustine a yaw shada lam a majaw hte kasi kamang tai ai hkawhkam jan bertha a majaw, hkawhkam Ethelbert gaw, English hkawhkam ni kaw na shaw na Hkristian hkawhkam byin tai wa sai.
Hkawhkam Ethelbert gaw, mung masha ni a rawt jat galu kaba lam a matu, shakut shaja ya ai sha n-ga, Hkristian makam masham rawt jat wa na lam sahgu a matu mung ra n rawng hkra garum jaw ya sai. Nat hkungri ni a shara hta Nawku jawng ni gaw gap nna, sumla naw ai ladat hpe tsep kawp tawn kau shangun wu ai. Kaga hkawhkam ni hpe mung, Hkristian makam masham hpe hkap la na matu hpaji jaw ya wu ai. Dai majaw, sinpraw ga kaw na Saxon hkawhkam Sebert zawn re ai hkawhkam ni mung, Hkristian byin tai wa ma ai.

San Pra ai Hkawhkam Ethelbert gaw, hkawhkam prat (56) ning, A.D 616 ning hta Madu kaw yup pyaw ban sa mat wa sai rai nga ai.

Shi n nga mat ai hpang, Nawku hpung gaw, shi hpe San Pra ai masha dang dat let, shi a Poi Nhtoi hpe mung, February shata (24) ya shani ding yang galaw ya taw ai rai nga ai.

Daini Nawku hpung gaw, San Pra ai Hkawhkam Ethelbert a Poi Nhtoi hpe galaw nga ai ten, anhte hpung masha ni mung, tinang lu da sai makam masham hpe, makam masham n lu shi ai Hpunau ni a man hta kasi kamang kaja lu jaw hkra shakut let, shanhte hpe lam woi madun ya lu ai ni byin tai lu hkra shakut sa wa ga law.

By;
Sister Rose Angeline Maran Nang Doi (SFX)

RVA-Kachin Service (Myitkyina)